胡民祥
|
一. 序章
|
一. 序章 人講「夏娃伊意；Hawai'i」是：「人間天堂。」 我已經去過兩屆夏娃伊意，第一屆是一九九四年十一月，第二屆是一九九六年一月。有一著有二；有二著有三；無三不成禮。所以，今年一九九九年七月底佫來去夏娃伊意。 第三屆來夏娃伊意，主要是來去參加世界第五屆台灣語文營，語文營參世界台灣同鄉會年會共所在辦。今年語文營的主題之一是：主權國家的台灣文學。我有一個講題：台灣文學史觀。 夏娃伊意佮我有寡因緣。我是台灣人，台灣人有平埔族的血緣。平埔族是南島語族，夏娃伊意的原住民嘛是南島語族。語言人類學的研究推斷結論是：台灣是南島語族的祖地，已經有五千年的歷史。南島語族分佈太平洋各群島，包括夏娃伊意群島，夏娃伊意的原住民是南島語族內底上界少年的，怹唯大溪地 (Tahiti) 划船，公元800年夠夏娃伊意；所以只有一千兩百年爾爾。另外一款講法是公元375年至450年左右就來夠夏娃伊意，是第一批。周明峰先生滯佇夏娃伊意近有二十年，伊有相當的研究，寫有一本《阿羅哈哀歌 -- 哈哇意亡國史》，公論報主編劉大元取得周先生的同意，現此時在公論報連載中。按呢講來，公元800年前後佫再來的是第二批。所以，上早可以講有一千五、六百年的歷史。 夏娃伊意的南島語原名叫作：Hawai'i，南島語的每一個音節攏愛發出聲來，應該是：夏娃伊意。西方人唔知南島語，煞變作夏娃伊。 聖經故事創世紀的神話，人類的祖先是亞當及夏娃。夏娃受蛇的引誘，在天堂偷食禁果，煞湠出了人類，同時夏娃及亞當煞不得不搬出天堂。 夏娃伊意人佇人間天堂滯有一千五百年，怹的火山神「佩麗；Pele」照顧怹千統年。基督教的信奉者，互上帝趕出天堂的夏娃及亞當的後代，來夠人間的天堂，將天堂的夏娃伊意人的天堂吞落去，十九世紀九十年代美國開始運作，想卜佔領夏娃伊意群島，1898年8月12日正式併吞。六十年後，一九五九年變作美國的一州，純種的夏娃伊意人已經真少。怹的語言真危險，強卜消失去。 當年怹唯大溪地駛兩條並排的獨木舟來夠夏娃伊意群島，怹叫獨木舟 Wa'a。這是我唯夏娃伊意字典查出來的。近年來，我時時會真注意南島語的關聯。親像這綴來夏娃伊意，在楊百翰大學所經營的波里尼西亞文化中心，我拄著一位來自紐西蘭的毛利人，嘛是屬於南島語族，我請教伊獨木舟的毛利話，伊講是 Waka。 過去台北盆地是一大片的湖，凱達格蘭族這個平埔族來來去去著是用獨木舟，南島語叫作 Banka。今仔日台北市的萬華就是 Banga；萬華的日語音發 Banga。日本人將過去中文文獻的艋舺 (Banga)換作萬華。艋舺取音取義；有舟船來來去去的意思，用來作地名。台灣人夠今猶原叫 Banga，伊是古早凱達格蘭族的祖地。 佇台灣本土意識愈來愈清楚的時代，當年台北市市長陳水扁將過去介壽路臭頭路，總統府前彼條大道，換名作凱達格蘭大道，實在真有意義；肯定咱有南島語的祖先，另外一條祖先是唐山公；南島媽及唐山公是咱台灣人的公媽。 來去夏娃伊意，咱台灣人的兄弟族群。第一屆去夏娃伊意，我滯佇李勤岸的公寓，受著伊及伊夫人惠珍親切的招待。李勤岸佇夏娃伊大學攻語言學的博士學位，跟鄭良偉教授研究台灣語文。李勤岸向我講：「我佇夏娃伊意原住民電台聽著 Banga著是獨木舟。」即擺我特別提起即段話，佫順煞講起字典頂是用 Wa'a，伊講唯凱達格蘭族的 Banga變夠毛利人的 Waka、夏娃伊意人的 Wa'a，這是可以找出怹變化的痕跡的。我唔是讀語言學的。但是，我有親身兩段經驗。一九九五年在日本拄著一位菲律賓姑娘，我向伊請教菲律賓話的獨木舟，伊講是 Banga；一九九八年十二月初九坐西北航空班機，唯地粗意飛日本大阪，一位菲律賓護士坐佇我隔壁，伊是南方民達那我的人，我問伊共款的話，伊共款是講 Canoe是叫作 Banga。顯然，台灣及菲律賓距離真短，接觸的年代嘛比較卡早，所以獨木舟的叫法變化猶未出現，攏是 Banga。 猶未寫著夏娃伊意紀遊本身，煞牽出遮濟獨木舟的故事。 主要是卜點出：台灣人的出路是太平洋，咱攏是南島語族的兄弟姊妹，獨木舟可以暢遊大洋群島。 我這綴來去夏娃伊意，是特別來，頂兩綴是卜轉去台灣，佇夏娃伊意停一站。這綴專程來，同時，佫參加世台會舉辦的跳島旅遊；遊可愛島 (Kauai)、大島Hawai'i及茂宜島 (Maui)。 我來蹉跎，我嘛來取經，夠遮是蹉跎及取經的序章。
一九九九年八月二十四日記 |