夏娃伊意紀遊

就是人家厝，有幾間空房，整理互伊舒適，招人來滯過暝，同時提供免費早餐。這款旅客房間叫作 Bed & Breakfast，我加伊號作早餐眠床。這款早餐眠床大概是戰後發展出來的，通常即款早餐眠床的主人是非常好客，是怹結交天下眾人的好方式。一二十年來，我定定會去想卜來試看覓咧，總是唔捌試過。即擺來去夏娃伊意參加世台會及台灣語文營，大會是七月三十才開始，我二十九號就夠夏娃伊意。當初報名時無注意，我二十九暝無訂旅社。夠卜出發進前一禮拜，我才想著愛趕緊來去訂旅社，想著多年來想卜試早餐眠床，猶未試過，即次就大膽來探險。

趁中晝歇睏時間，我來慷慨公司的電腦，上網路找夏娃伊意的旅社資料，專門找早餐眠床，印出五、六頁的眠床旅店的名單。我專門選離開雨娜魯魯，一方面是考慮其他所在比較卡清靜，嘛應該會卡俗。所以，我選定後山地區。經過電話聯絡，有的留話，但是無人回音；有的接著，叫我寫電子批去預約。最後是一位婦人人送電子批回覆，接受我的預約。伊的早餐眠床是在後山的東北方，靠海的小鎮。就是雨娜魯魯的北爿，愛翻過一座山，是一個清幽的海墘的鄉鎮，叫作 Kailua。你若是徛在雨娜魯魯的 Waikiki，你人背水、面對陸地，就是面對北方，Kailua 拄好是東北爿。

我是12點20分降落雨娜魯魯機場。領著我的行李，隨時去坐租車公司 Avis 的交通車，因為我是怹的上等顧客，交通車司機早就事先通知；來夠怹的車場，我的車已經發動，佇遐等候我。十二點四十五分離開機場，開落夏娃伊意一號公路，向 Waikiki 的方向開去。然後接著向北的61號公路，爬入山區，通過磅孔，開始落山，後山的海出現，一路開夠海墘就是 Kailua 小鎮。一點四十五分找著預約的早餐眠床旅社 Kay's Vacation Rental。早餐眠床旅社的主人是名叫 Brenda 的婦人人，原來伊是阮賓州西爿的人，在賓西出生，後來搬來夏娃伊意，經營 B & B。伊掣我去人家厝社區的一塊厝，厝內的一間房間。房間設備參旅社共款，不過因為是在住宅區，真安靜，無市區旅社的喧嘩。

即擺參加世台會年會的同鄉，相信真濟人攏有參加胡亞夫島一日遊，巴士一定有經過 Kailua。恁大家現在嘛已經知影 Kailua 是夏娃伊意話。我問過夏娃伊意人，Kailua有甚麼意思。在跳島遊覽的時，咱攏有去可愛島一日遊，是滯佇 Wailua 的 Holiday Inn。Kailua 及 Wailua 拄好差一個字母。怹一定有共同的所在，夏娃伊意人替我解決這個謎底。Kai 原來是海水、鹹水的意思，Lua 是灣的意思，所以 Kailua 是海水灣，猶有孔的意思。原來，Kailua 的海墘灣起來宛然是一枝長柄的大湯匙，你若化身做一隻 Nene，飛佇空中，作鳥瞰，你看著湯匙款的水孔、一個水洞，就是一個水洞款的海水灣。這屆來夏娃伊意，我上尾仔暝，八月初七暗，佫來海水灣 Kailua 滯早餐眠床，八月初八早起來夠伊的海墘，互我掠著 Nene 空中看落來的美景。其實伊比 Waikiki 佫卡水，清靜、少遊客。等候上尾仔篇才來好好仔紹介這個海水灣。

你可能好奇，怎樣我選 Nene 來鳥瞰 Kailua？啊！Nene 是夏娃伊意的本土鵝。生物學家認定怹是加那大的鵝 (Canadian Goose) 的後代。唔知在甚麼年代迷失來夏娃伊意，然後在夏娃伊意生湠，變作夏娃伊意的在地鵝。伊是夏娃伊意的州鳥，有一陣險險仔滅種。怹生湠佇大島Hawaii及茂宜島爾爾。

我無將 Wailua 漏溝去。Wai 是淡水的意思，所以 Wailua 是淡水灣。咱去可愛島的時，有坐水艇遊河。你敢猶會記得河名？就是 Wailua River (淡水河)。河出海形成一個灣嘴，就是淡水灣。夏娃伊意群島少有水量豐盛的河流，Wailua 河是少數的一條。原來這條淡水河的發源地是世界雨水上濟的山頭，這座山叫作 Waialeale。山高有海拔5208呎，每年落雨量是486英寸。

所以，你知影啦，台灣及夏娃伊意有共同的所在，除去我講過的南島語及南島民族血緣以外，佫有艋舺。凱達格蘭族划著艋舺，台北湖及淡水河來來去去；夏娃伊意人划著 Wa'a 嘛在 Wailua River (淡水河) 出出入入。拄好來夠後山的「海水灣」小鎮，煞將大島、可愛島及茂宜島的旅遊點出來啦。咱小擋咧。

我唯早餐眠床房間出來，跳落租來的車。我愛去找滯佇雨娜魯魯的李勤岸，伊安排一場文學朋友的聚會。我在來夏娃伊意的大陸航空班機頂已經神遊這場聚會囉。根據伊的安排應該有林央敏、林宗源、莊芳華、鄭邦鎮。攏是見過面的文友。

我無抄原路去雨娜魯魯。我開向東北角的濱海公路，就是72號公路。先是一段莊腳鄉村，有麻黃、榕仔樹，燈仔花，有形台灣的景緻。然後路沿著海墘彎趖。後山的海水碧綠，海湧沖著岩石，激起白白花粉，佫紛紛摔落。海水也沖入岩壁，壁有透天孔，海湧一湧一湧來，水無退路，往高去，擠向透天孔，射出一股水柱，宛然是鯨魚噴水的款式，嘛有黃石公園的噴水泉的模樣；怹的來源雖然無共款，表現的景觀有寡類似。

發現有真濟人拍錄影帶，我想這是現代遊客的一項枷。翕相抑是拍錄影帶，景留佇紙或是磁帶，唔是家己的頭殼底。有時我會想這項問題：卜留在機器抑是頭殼內？佗一項卡有意思？卜有第一手的体會，變成人生經驗的一部分？或是唯記錄帶去作間接的享受感受？

沿路開沿路停，唯海水灣小鎮夠 Waikiki 唔免一點半鐘。

Waikiki 商業化，後山猶保留有天然的風味。

Waikiki 已經是美國化、大陸化，那像美洲東海岸的海墘城市：Miami、Daytona、或是 St. Petersburg。我早著來夠李勤岸滯的街路叫作 Liholiho，台灣話聽起來是「你好你好」或是「李好李好」，因為李勤岸滯佇遮。街路罕得有空的停車位，我踅來踅去，攏找無位停車。實在是「Bohoboho無好無好」；踅卜有半點鐘，才找著一位空位。行遠路來夠李勤岸的公寓。結局公寓無法度入去，因為無入去的號碼，無法度通知怹我來夠樓腳。只好佫行遠路，找著電話亭，通知伊我來夠。

原來，伊是安排大家去何米豐先生府上。彼暝米豐夫人準備家鄉美食，眾文友食甲嘴笑目笑，相會樂暢，我也見著一寡新朋友，留待後禮拜講分明。

一九九九年九月十四記