胡民祥
|
一. 序章
|
七. 來去偎伊去去海墘 徛在第61號公路的南爿觀景站，看著的盡是人造斷崖。 跳入車，順著車河，駛入一號公路，向東流，越入去Waikiki的車道，來去偎伊去去。來去報導，來去Hawaiian Regent大旅社，今年世台會在這間旅社開年會。 事先有研究過地圖，就順著Kalakaua Avenue 向東開，偎海墘無偌遠，有兩座直溜溜的大樓，長年看著日出日落，看日頭徙過鑽石山頭 (Diamond Head)，照著長條的偎伊去去海墘。Hawaiian Regent 大旅社在偎伊去去海墘的東爿靠鑽石山頭。所以無什麼困難，我在十點外來夠旅社，停車報到，然後將行李寄存旅社的保管處。 1994年11月初次來，1996年1月佫來，攏在胡亞夫島，雨娜魯魯及偎伊去去算是真熟。離開大旅社，我輕輕鬆鬆開車向機場去，沿路開沿路觀光。我無走一號公路，主要是順著海墘遊車河。十一點半夠機場的租車公司，坐怹的交通車去夠機場，找著公車站，唔免兩箍銀的車錢，公車會載我一路夠偎伊去去。 十二點正唯機場出發，車頂有英語聲，佫有台語聲。台語人可能是來參加世台會的台灣人，看來台灣人唔定我會拍算盤，會曉坐公車：省錢。開出機場無偌久，拄著車塞，公路煞宛然是停車場的款。若是無急，互你有坐牛車慢慢仔趖的滋味。莊腳囡仔，四、五十年前的台灣農村子弟，攏有坐牛車的經驗，回想牛車路頂牛車依依歪歪行過田岸路的情景。但是，今仔日七月三十拜五，我是在人間天堂的夏娃伊意的雨娜魯魯市區，無牛車；歸路攏是鐵殼車，天堂的汽車交通嘛是有塞車的症頭。塞車是現代汽車文化的文明病，聽講是無醫的款。 公車的前部分有四分之一車位是專門替老伙人設的。拄開始的時，我唔知影，我坐佇這款老年人的保留位。真緊我看著車廂壁寫的字條仔：老人保留位；我緊換去後面的車位。大部份的遊客攏唔知影，因為無注意文字條仔的記述，坐甲真歡喜。車頂各款人物起起落落，起來一對老翁老婆仔，車滿無空位，老先生手指字條仔，奧少年歹勢歹勢緊爬起來，老先生叫伊的老婆仔就座，老婆仔煞也歹勢，唔肯坐落去。老婆仔等夠非老人位有空位才去就座。 觀光客坐公車的也不止仔濟，有一個媽媽遊客帶兩個查甫囡仔，大約是八歲及十歲，一個坐佇媽媽的身軀邊；媽媽的手佇囡仔的肩胛頭及胛脊趖來趖去。我看著真安祥、真滿足的囡仔，嘛看著一款真疼痛的老母的姿勢。 公車趖過市區，來夠偎伊去去海墘的東爿已經下午一點，來夠一個站牌仔，一看是 Ana Moana Mall，我臨時決定落車。有二個原因，第一，腹肚咕咕叫，第二，這是夏娃伊意上大的購物中心。我真數念內底有一間日本風味及日本貨的百貨公司，附設有便當快餐，經濟實惠，可以坐落來寬寬仔食。1994年李勤岸及黃惠珍掣我來食過中畫怹的花樣真濟的日本便當，印象深刻。 料理不止是口感爾爾，猶佫有美感的必要，一個簡單的便當盒仔，怹日本人嘛是無隨便，攏是經過美術設計。時常看著報導文學寫日本料理：好看無好食；食品小小細細；盤碟一大堆。意思講日本料理無好食。好食無？我想是看人品味，我是真欣賞，嘛真愛食日本料理。若是講著量小及碗盤真濟，哈！彼拄好牽涉著我講著的「美感」，日本人的碗、箸、盤、碟的組合，是一款日常生活藝術，美感是日本料理的一部分，真要緊的一部分。日本人歲壽長，這參怹的飲食文化真有關係，日本料理的美感平衡口感的需要，結局日本人未暴飲暴食；怹是七分口感飽，三分美感飽，這是長歲壽的飲食文化。 一客日本便當及一罐麥仔，我心滿意足，唯Mall踅出來，坐公車來夠世台會開會的旅社，報到的人愈來愈濟，比早起佫卡濟。老朋友新朋友輪流來夠眼前，歸個註冊的大廳攏是台灣人頭，空間攏是台灣聲調。 拄著水牛城的老朋友黃增桐及伊夫人洪惠，怹是今仔日唯紐約來，嘛是經過休士頓飛來雨娜魯魯的。自1973年我離開水牛城了後，難得相見。今年真難得，阮是第三擺見面，第一擺在華府，向中國朱鎔基示威的場合，是五月。第二擺是七月初的美東夏令會，我去演講〈台灣文學建國夢〉。事前唔知怹也欲來夏娃伊意參加世台會，非常歡喜。是下午三點外相會，怹一直喝枵。找著旅社大廈的一間日本料理店，司壽五點才會開，所以就叫日本麵，我陪怹，飲麥仔。我在公論報的〈台語文路上話工程〉散文，寫我的留學經驗，是用莊家湖筆名發表的，唯賓州露意堡寫夠水牛城、寫夠核羅里達的天霸市、寫夠茉里鄉。洪惠真敖推理，馬上臆是我寫的。怹兩人看甲真趣味，怹看知影我寫的台語散文；我一聽嘛真歡喜，馬上簽一本《台語文_工程話_故人情》互怹作紀念，這本冊是我參簡忠松合著的，內底拄好收有〈台語文路上話工程〉這篇散文。這本冊的「後記」是簡忠松寫的，最後一段真有意思，抄錄如下：
「台語文本身猶是初初開始；雖然台文已經是顯學，但是文字的統一猶 文學是一款三度思維空間的交流過程；親像我是第一度：作者思維，我的作品是第二度：思維成品，洪惠黃增桐是第三度：讀者思維。當洪惠第三度空間，向胡民祥第一度空間反映，思維交流變成一個立體運作。當然，過去我就經驗過即款的立體思維交流。台語文學的三度思維空間的交流總會開花結果，道是台語文學出頭天。當然時間表愈短愈好，這就需要作者及讀者的積極對話交流，好的作品是促成即款積極交流的必要條件，台語文學作者著愛面對即款挑戰。 我感謝洪惠及黃增桐的一大罐麥仔酒。這是第二罐，第一罐是在Ana Moana的日本店飲的，是小罐的。 無三不成禮，四點半我佫飲一大罐，共款是彼間黃增桐及洪惠食日本麵的所在。 參黃增桐告辭，來夠註冊大廳，看著好朋友蕭宗揚，伊唯華府來，伊共款喝枵，所以，我就直接掣伊來夠共間的日本料理店。 結局，歸下晡我人馬西馬西。食暗頓拄著在地作家周明峰醫師的時，我猶是浸在麥仔的醉之鄉；不過，猶是會記得1994年初次來夏娃伊意的時，受著明峰親切的招待。
一九九九年十月初五記 |