夏娃伊意紀遊

在世界台灣同鄉會的節目單頂頭，並無詳細的台灣語文營的節目。所以，雖然節目真精彩，六、七百位參加的世台會的同鄉，攏唔知影，包括我的好朋友，滯在賓州大學城郊區的張坤文先生，伊最近來電話，才發覺失去良機。七月三十一日是第一工，下午三點半是世台會安排遊「波里尼西亞文化中心」的時段，台語文營節目排甲滿滿滿，台語文的眾友志只好放棄遊覽，包括在中心的夏娃伊意料理美食。

今年的世界台語文營是第五屆，明年第六屆欲去佗位辦？經過熱烈的討論之後，決定辦二場，一場在高雄，佫一場在德州的休士頓。高雄會期大概是七、八月的時，伊的特色是欲強調「聲、光、影、視」台語口語的生存的功能，主辦單位已經有「台南文化基金會」，協辦單位有「高雄市政府」，已經得著幾百萬新台幣的支援，聲勢必然是空前的。休士頓會期決定在五月底，伊的特色是欲強調「多元化書面語文」對發揚台語的功能，包括「台語文」書展，決定由蔡正隆紀念基金會主辦。高雄大會唯口語的生存出發，若是無口語的台語，甚麼攏免講，所以，若欲救台灣話，當然著愛想辦法去增加講台灣話的人口，特別是青少年的一代，「聲、光、影、視」必然是足有效的媒介。休士頓大會強調多元化書面語，主要是看著：台語若是「有語無文」，在資訊時代是無法度生根，而且，書面語著愛多元化，定著愛行夠「全方位」的台語文，著是用台語文寫文學、寫哲學、寫科學文獻、寫學術報告、寫政論、寫法律條文、....、寫任何文獻。

最後的結論是兩場大會的主題攏是正確的，事實上，「語及文」那像銀角仔的兩的面相，互相需要，互相補充。

世界台灣語文營是1995年開始的，蔡正隆是創會者，在休士頓舉行。公元2000年，蔡正隆紀念基金會決定接辦第六屆，佫在休士頓舉行，是對蔡正隆的一款肯定，島外及島內同年辦，是一款島內外的團結，也象徵大會的成長。高雄會及休士頓會是一体的，成果準備互相分享。

眾人在波里尼西亞文化中心，享受夏娃伊意美食及歌舞；語文營友志討論明年的語文年會地點，決定好勢，人人腹肚枵，但是文化中心遠遠在胡亞夫島的西北角，車程至少二點鐘。猶是就地在「偎伊去去」找食。

阮一陣人行出會場的大旅社：Hawaiian Regent。同伴有酒井亨、黃晴美、駱良美、吳秀麗、林央敏、林宗源、陳雷、鄭良光、鹿耳門魚夫、潘俊傑、胡民祥及本地人李勤岸，阮十二生肖行位偎伊去去中心區。

黃晴美這位台灣女性，當年唯北歐、夠西歐、夠北美洲，展開伊的抗爭運動；這位黃文雄的小妹，鄭自才的牽手，美國引渡鄭自才回美國，欲判鄭自才刑期。伊參黃文雄槍殺蔣經國的行動，引起世界的注意，引渡鄭自才的抗爭，由黃晴美作中心，唯瑞典夠英國夠美國，抗爭拖長一、二年。「這是真悲苦的代誌，」我講。

晴美心平氣和回我：「無感覺悲苦，因為這是台灣人抗爭，我擔擔著其中的一部分。」「一步一步行，得著真濟國際人權運動者的支持及幫助，」伊講起當年。

行在「偎伊去去」的大街路，這位勇敢的台灣女性，我唯報章雜誌認識伊，強強欲三十年。竟然在夏娃伊意，才初次見著伊本人。黃晴美有心，是少數者唯大會過來，來參加語文營的節目。

「自才在英國監牢中，有人建議我去見英國國會議長。」晴美繼續講往事，「我去國會填表申請，欲見議長。議長親身出來，接我入去。誠懇親切聽我的訴求。」

當時著愛照顧伊的幼囝，佫時時歐洲參北美洲來來去去，進行伊的台灣人政治抗爭運動、台灣人的人權運動、台灣人的生存運動。

「當時，出外抗爭，幼囝攏是瑞典朋友照顧。囡仔大漢了後，攏有了解父親自才的行動。」晴美補充，「這是互我有所安慰的。」

黃晴美可感可敬的台灣女性，參伊短短的相會及交談，互我心動，互我懷念，也互我看著台灣人的尊嚴及美夢。

李勤岸講：「有一間東洋日本料理，價數公道。」

阮這陣人，由伊掣頭，行入一間高樓大廈。駱良美忽然感覺腹肚無真拄好，決定勿食日本料理，黃晴美陪駱良美去。駱良美是高慶和的牽手，高慶和就是「台南文化基金會」的董事長，本誠高慶和嘛欲來參加第五屆世界台灣語文營。參伊的牽手去夠機場，才發現護照過期，無辦法來美國，交待駱良美全權代表伊。駱良美真正發揮代表權，決定出來主辦第六屆世界台灣語文營。

我佫見著另外一位有魄力的台灣女性駱良美。

日本料理啖過，李勤岸掣眾人去踅偎伊去去夜市仔。

開始的時有十身生肖，踅夠尾仔來，偆五身。酒井看著一間冰淇淋擔仔，先買一粒，我買四粒請秀麗、央敏、勤岸及民祥。

吳秀麗者老師是一位優秀的台語文教學家，伊在真困難的條件之下，編出一套台北縣的台語文教材。伊這擺就是來報告編教材的經驗。秀麗是好媽媽，查某囝指定愛一腳手指，有海豚圖樣的手指，是伊多年前來，所買的彼款的海豚設計。阮陪伊一間踅過一間，夜市仔行透透，攏無。

來夠一間韓國人開的，秀麗講：「看著啦。」標價美金24，人人講半價，伊家己唔敢喝，秀麗是敢拼敢衝的有為的台灣女性，敢堅持理想的新女性，有人霸佔伊的著作，伊抗議到底。卻是，伊煞無膽喝價，直直講：「替我喝，替我喝。」我為伊喝12。少女翻身問伊的阿舅。

「好，12箍賣你。」店頭家講。

秀麗歡歡喜喜，順煞佫買二盒夏娃伊意的火山豆。

二盒火山豆，小兒科。聽講，林央敏這擺來，火山豆是買歸布袋的。

參各地各國的城市共款，荷娜魯魯夜市仔甚麼攏有地賣，唯人賣夠物。

阮專門買物。物價隨在人喝，買、賣平看雙方的意願。

一九九九年十一月十七日記