夏娃伊意紀遊

田莊的四箍笠仔，有堤防、田、圳溝、溪流、樹林。所以，鳥隻真濟，其中有粉鳥的野生兄弟：斑甲。五、六十年代的台灣人猶原散赤，會飛的、會走的、會泅的、攏是食補的對象。你若有本事可以掠飛、走、泅的，你可以食補。走的田鼠、野兔可以用鍵仔掠；泅的土殺、鰻、鯽仔、草魚可以釣；飛的啼雞、水鴨仔可以用槍拍。但是斑甲用槍拍？那像宰雞用牛刀：傷過傷重。

五、六十年代，阮老父無閑農事，兩位阿叔無閑讀冊。作田人禮拜日無歇睏，讀高工的阿叔禮拜日免上課，動腦筋欲掠斑甲，甚至粉鳥。兩位讀台南高工的阿叔，大漢的讀化工科，細漢的讀機械科。怹兩人就地取材，用竹仔、樹婆仔枝、膨風豆、絲線、鐵條，設計一套掠斑甲的活套。膨風豆是鳥仔上愛食的五穀之一，所以用膨風豆作餌。膨風豆硬，浸水變軟，用修尖的竹仔可以插入去；竹尖那像齒托仔長短，一頭插有膨風豆，一頭插入樹婆仔枝。樹婆仔枝輕輕、冇冇、軟軟，宛然有西方人酒塞的軟木的質地及功能。

樹婆仔枝選尾溜的，枝細那像鉛筆，剪作三寸長一條，插膨風豆的竹尖的另外一頭插入三寸一節的樹婆枝的正中央。樹婆枝的兩頭分插兩枝竹尖，每枝約三寸長，一頭尖一頭鈍佫粗，粗這頭刻出一個缺口。組立圖是按呢：樹婆枝貼地，膨風豆的竹尖離地平線30至40度，兩枝有缺口的竹尖徛向天，斜斜仰天。一條白線結一節活套，活套的絲線掛在每一枝竹尖的缺口，膨風豆拄好囥在活套的正中央，活套的絲線的一頭縛著一枝鐵條，鐵條深深插入土。樹婆枝用土沙粉小寡掩坎，順煞固定。

斑甲嘴一啄膨風豆，樹婆枝架倒向伊的頷頸，活套落在伊的頷頸，斑甲一著驚、起飛，鐵條互伊飛未去，活套口縮小，斑甲吊投。粉鳥若來，共款吊投。

囡仔愛看鬧熱，看阮阿叔設計，去田岸佈置，去收斑甲粉鳥，四五十年後，猶原印相深刻。在荷娜魯魯的偎伊去去海墘大道向著樹婆仔，互我想起童年的樹婆仔。樹婆仔熱天花開，雨過日出有虹的時，一蕊一蕊佈滿樹欉，黃黃一蔟，黃黃一蔟，特別清美。

單獨一欉樹婆仔，在偎伊去去海墘大道，真特出。

夏娃伊意群島的花草樹木水果，攏是外地入去的。有天然的傳播的，也有人工的傳湠的。天然傳湠來自風吹入來、海潮湧來、鳥隻帶入來。人工就是史前的南島語族帶入來、十八世紀以後傳入來。樹婆仔怎樣傳入來？

八月初二跳島旅遊開始。第一站是人間天堂的花之島：Kauai; Garden Island。安排的遊覽重點之一是Wailua River (淡水河)。坐船遊河，佫看著樹婆仔。唔是一欉，是歸片的樹婆仔林，黃花開的樹婆仔林。事實上，淡水河以外的可愛島也有樹婆仔林，坐佇遊覽車，看著樹婆仔林，一林過一林。這款林相互我感覺樹婆仔已經在夏娃伊意生湠真久長。台灣的樹婆仔參夏娃伊意的樹婆仔敢有關係？若是南島語族的波里尼西亞人帶入來的，有可能參台灣的樹婆仔有關係，因為，全部南島語族的祖地是台灣。

另外有意思的是鳥菝仔。

咱今年世界台灣同鄉會的會友大概年紀攏在五、六、七十歲。樹婆仔或是冇樹仔真濟人恐驚是無經驗，但是鳥菝仔可講是共同經驗。我講的是古早土菝仔，唔是即馬台灣用泰國菝仔改良過的大粒種鳥菝仔。古早土菝仔有白心的、黃心的、紅心的。紅心的是粉紅的色緻。大粒菝仔雖然食了無放槍子，但是，大粒菝仔無土菝仔的芳味。

親像樹婆仔，四五十年後，我佇夏娃伊意見著古早的土菝仔，彼款粉紅的土菝仔。第一擺是1992年，初次來夏娃伊意的胡亞夫島上，在波里尼西亞文化中心看著，怹特別波里尼西亞的特產，怹請遊客試滋味，這款土菝仔參古早台灣土菝仔共模樣，共款細粒種，食起來口感相共，芳味嘛相共。台灣敢猶有土菝仔？

咱在荷娜魯魯機場，坐上跳島的飛行機，由Aloha航空經營。恁敢猶記得飲料是啥物款的？粉紅色的，就是夏娃伊意的土菝仔汁。風格特出的飲料，可講是Aloha航空的招牌，互我永遠記持頭殼中。

第四工遊茂宜島，去探訪古戰場公園，公園野生土菝仔欉處處攏是。佇古戰場，我第二擺食著芳芳的土菝仔。我直覺這是來自台灣的土菝仔，是南島語族生湠的見證。

我欣賞夏娃伊意人，怹保留南島語族的文化。

一九九九年十一月二十四日記