夏娃伊意紀遊

　司機載阮離開火山公園，伊講一段火山女神偑麗的惡霸情史。Ohia樹是夏娃伊意上普遍的樹木，佩麗的管區的山坪，火岩漿拄好冷郤無外久，Ohia(胡希亞)就定根莩芛。這款樹開的花叫作Lehua。傳說一位少年仔叫作胡希亞，伊的愛人仔是Lehua(梨富亞)。佩麗也愛著胡希亞，佩麗化身做美人來追胡希亞。胡希亞攏無動情，佩麗一氣將這對情人燒死。後來，佩麗想著家己醋桶一個，愈想愈反悔，用伊的法力，將怹化作ohia-lehua，一對情人永遠相隨相倚。梨富亞花是佩麗的聖花，傳說你若是愛梨富亞花，先向佩麗作適當的祭拜要求，若無，你會受食著大風雨的洗禮。

　夏娃伊意人意愛在頭殼插花蕊。評看你的身分，作適當的插花，司機按呢講：

　　結婚的人，花插在倒爿耳頂，免花心。
　　無對象的，花插在正爿耳頂，金金相伴。
　　烏貓烏狗，花插在後殼，開拍鐵(Party)。
　　無滿足的，兩耳攏插花，處處找好孔的。

　遊客若想著處處找好孔的，司機建議你：雙耳插花，後殼也插花，多多參加拍鐵。

　遊覽車欲開向烏砂海墘公園，人人忝，強強欲睏去。司機緊佫放一條歌，是在夏娃伊意紅過三、四十年的Don Ho的Tiny Bubbles，另外一條是貓王的歌叫作Grass Shack。離火山區愈遠，樹木臭火礁的表象漸漸消失，樹欉愈來愈青翠，有經過規遍的火山豆(Macadamia)樹園；海岸線的樹木粗壯雄偉，柴紅的九重葛夾在青綠的樹道，順著公路排向前去。其實規島本誠攏是火山岩石，但是靠海地區離火山區遠，受風化，比較卡有鬆土，樹木生長卡容易，當然翠綠。

　人人愛睏中，遊覽巴士開夠烏砂海邊公園(Punaluu Black Sand Beach Park)。由火山岩漿化成的烏砂金皙皙，但是，並無想像中烏墨墨的程度。烏砂海墘有綠色的大隻龜，阮去的時，真拄好有三隻起來砂堆曝日。人人好奇，白人遊客去圍看，一堆台灣人來夠，佫亂摸，摸夠額啦，佫掙來掙去，參龜翕相存證。阮的車長陳秋田看著警告牌仔，向逐家宣布：「美國聯邦政府及夏娃伊意州攏有保護綠龜的法令，唔好亂亂摸伊，會罰金。」

　離開烏砂公園，一路向貢那(Kona)開，攏是開在海墘公路，車夠貢那已經是黃昏，分配房間，食過暗頓，一睏夠天光。

　世台會的遊覽車攏總有六台，三百人攏在貢那集中。阮第四車來夠時，已經有其他車先來夠。看著巴士先來的同鄉，怹人人手中有木瓜，一位同鄉講：「三粒美金一元，結局互台灣世台會的遊客掃甲光光光。」我嘛是木瓜迷，今仔日無機會啦。第二工下午是自由活動，我向市中心直直行，來夠一個露天的農民市場，夏娃伊意人自產自銷，有芎蕉、木瓜、鳥拔仔、荔枝、...等等，我買一掛呂宋蕉仔，三粒大木瓜，攏總才二元半，實在有夠俗。

　六點半，早餐猶未準備好，坐在「貢那休閒旅社」的臨海餐廳等候。目珠看湧，耳聽浪濤；湧無停時，濤聲不斷。湧及濤象徵動的世界，動是生命的特質；生命來自海洋，無時不動的大海。美國總統甘乃迪講過：海洋是生命的原鄉。伊的後生七月飛行機失事，栽落海過身。伊的阿叔羅伯，請軍方以海葬告別，將骨灰掖落生命的原鄉。

　台灣生理人走透透，連大島嘛有，這間「貢那休閒旅社」旅社聽講是台灣人經營的。台灣來的生理人，知影台灣人食木瓜，所以早餐準備足濟木瓜。人人食瓜，一盤過一盤；先生想欲食太太盤仔中的，食無著，家己緊去捧一盤來。世模兄及麗華姊，木盛兄及文治姊嘛攏一盤過一盤，我嘛共款。

　行程排甲滿滿滿，用過早餐，人人緊坐巴士。今仔日第一站安排參觀皇家Kona博物館及咖啡工廠。夏娃伊意是美國唯一產咖啡的州。

　貢那咖啡(Kona Coffee)足出名。咖啡栽培是1821年引入夏娃伊意，在貢那的山坪盡是火山土，用鋼鑽向火山岩鑽孔，加肥料落去，咖啡栽入去，海拔800至1000英尺是種咖啡的好地理。700英尺以下種的咖啡，品質差，若是一定欲種，需要落重肥。水果園漸漸去互咖啡取代。因為攏是山坪地，用手採收，然後佫愛一袋一袋扛落，是一款真粗重的工課，愛是好体力的人，才食會消。

　咖啡博物館是私人經營的，怹泡咖啡互逐家品芳啖試，款式濟濟，其中有一味是「火山豆咖啡」，就是咖啡參火山豆粉。眾人鼻咖啡芳，我緊去咖啡工廠看怹製咖啡的過程。怹插牌仔說明，咖啡豆採收了後，先去皮，將豆粒分出來，然後互日曝。曝日原來是防止澹溼，豆粒若溼溼，會爛去。這款過程有寡形台灣人曝稻粟，粟仔若是無曝礁，嘛是會發芽爛去。咖啡豆一般是「兩爿半仁」對生，有一款例外，就是咖啡豆是圓仁一粒。咖啡工廠邊仔也有一條岩漿磅孔(Lava Tube)，我落去鑽一遍，算是我第二擺鑽岩漿磅孔。當然在火山公園鑽的彼條比較有卡長，公園彼條有名有姓，叫作Thurston Lava Tube。

　Thurston岩漿磅孔展示火山區的另外一款青翠的景觀，比起礁礁的火地區，磅孔區是翠綠遍地。欲入磅孔進前，滿地的羊齒植物的林相，佫是特別大欉，夏娃伊意本地的鳥隻飛來飛去。來夠磅孔前，看起來那像是人造的，可比是一條人造的、互礦工入去採礦的磅孔。羊齒及青苔垂吊磅孔前。磅孔一行約十分鐘。磅孔直徑十五至二十英尺，二千度高溫的岩漿鑽地所形成的。我舉一個實例互逐家作參考。

　我的厝埕，冬天時落過大雪，滿埕是白白扎實的雪砂。兩年前，周末，我起來巡視透早的雪砂埕頭埕尾，在美洲杜鵑樹的附近，雪砂地真濟洞，直徑差不多有鉛筆大小。有的洞形是正圓，有的是橢圓，洞直溜溜，是一款一流的工程製品，每個洞底攏是烏烏。我真好奇，用手指頭一挖，原來是鹿屎，鹿屎那像羊屎礁礁形圓圓。我推測是按呢啦，暗暝鹿仔來食杜鵑樹葉，突然屎急，開始方便，冷風一陣，鹿仔尻川起加冷損，那機關槍掃射，鹿屎粒粒那像槍子，掃過雪砂地，高速高溫的鹿屎粒鑽出圓圓直直的高品質的洞。那像鹿屎子鑽雪成洞，二千度高溫的火岩漿鑽地，形成阮行過的磅孔。

　我唯貢那咖啡工廠的岩漿磅孔趖出來，看著怹的公布牌標示：一八六六年七月，馬可吐溫按呢呵咾：「我想，貢那咖啡芳味嬴過種種的品牌；無論怹是在佗位出產，不管怹是啥款品種，攏輸貢那咖啡。」

　唯咖啡工廠出來，原本是欲去邱可船長的紀念館。邱可1778年來過夏娃伊意大島，受著原住民的熱烈迎接，因為人人認定伊是怹所奉的神明。後來，原住民發覺伊是平凡的人。在一場衝突中，邱可船長互原住民宰死。司機感覺並無特出，眾人也無意愛去看邱可紀念館。臨時改變行程，來夠Honaunau的一個山坪，海拔五百尺高的所在，有一座木造的白色教堂，教堂內面全部是聖經故事的壁畫，是比利時神父向夏娃伊意人傳教的古教堂，可見原初是以圖傳教，後來才用拼音字寫夏娃伊意話。這款情形參荷蘭人向台灣平埔族傳教真類似，荷蘭傳教士用羅字拼西拉椰族的新港語，編福音書傳教。後來，平埔族用即款羅馬字寫地契，參漢移民簽土地買賣出租的契約，歷史上叫作新港文書。

2000年2月初二記