夏娃伊意紀遊

阮滯入即間是「皇家貢那遊閑大旅社；Royal Kona Resort」，聽講是台灣人經營的。旅社總共有三棟接粘作伙，這是貢那足大的旅館，有可能是上大的。唔知是獨資抑是合資的？比起可愛島上間阮滯過的「假期客棧；Holiday Inn」，這間貢那旅社的設備猶未入標準。譬如，洗面鏡台的水銀失修，地毯老舊；人咖啡是免費的，怹一包欲收人三元，電視節目少。

一路行落來，一路遊落來，拄著真濟創業成功的台灣人，有合資，有獨資經營的。獨資的企業比較卡濟，合資的少。創業的範圍有高技產業，有進出口，有餐廳、旅社、旅行社。親像安排即擺世台會跳島旅遊的安娜公司，就是房地產業延申至遊覽業，拄拄好插入遊覽業，猶有真濟需要改進的所在，可以了解也可以諒解，希望怹將來是夏娃伊意一流的遊覽公司。

事業本誠就歹經營，有成功嘛有失敗的。世界各國的人攏共款，生理場那戰場，咱定定聽著一句話：「商人無祖國」。有影，商人看著是銀幣。過去，每年國會抑是行政機構討論是唔是欲互中國「最惠國」經濟貿易資格。在行政機構考慮無愛准的時，是啥物人替中國背後恬恬仔運作支持？就是「商人無祖國」跨國企業，親像波音飛機公司、大間的百貨公司。台灣的生理人共款也是「商人無祖國」，怹看著攏是商機及銀幣，一間一間拼緊緊，徙去中國作生理。即款「商人無祖國」的行為，會將台灣即粒經濟「明珠」帶入甚麼款的狀態？嘛有「去勢」的政治人物，感受著即款「商人無祖國」氣勢，煞大聲喝出「大膽西進」，數想再壯陽的日子。佫有大資產家，將家己的查仔_仔配互人做副手，希望直接控制政權，取消戒急用忍的經濟設限。猶無身分的「明珠」，若無注意，那像水蛙互政商交結送入「烏水溝」，「明珠」伊光度絕對無法度突破烏暗大陸。

講夠國家層次的生理場，傷過嚴肅。即綴來遊夏娃伊意群島，有拄著一位生理界的朋友，講起台灣人本身的商戰相殺。伊的故事，互我想起另外兩個類似的故事。不而過，逐家聽好勿誤會，台灣人攏是敗類，親像我欲來描寫的故事，各民族也攏一再發生。

故事之一是台灣人合資開餐廳。時代是七十年代拄開始的時，人攏是數想銀幣，這款慾望是「無底洞」。七十年代的台灣留學生，有濟濟已經出業就職，衲袋仔有寡錢。但是，航太工業裁員，景氣無講真好，讀物理的失業者嘛真濟，特別是高能物理，有錢的想欲趁錢，無頭路的想頭路。水牛城就有即款的條件，逐家出資經營餐廳，請物理博士做經理「萬里長城」，報紙的美食版大大呵咾，顧客愛來交關，餐廳時時客滿。有股份的人分紅利，分甲面笑目也笑，家己去餐廳嘛有打折。

二年落來，開股東會議，負責經營的物理學家是一流的數學家，伊的高能物理公式一算，眾人的投資款偆無半仙，甚至佫是赤字紅貢貢。餐廳只好收擔，無偌久，物理學家開起一間食品加工廠，愈開愈好年年趁錢。傳說：負責運作的高能物理學家，博士學位專攻「烏洞；Black Hole」，是一流的「烏洞天文學家」。難怪那像「流星」的眾鄉友，互伊烏洞一粒一粒吞了了。

故事之二也是合資經營的例，唯天文下凡夠地球，一位專攻地質學的科學家，伊知影啥款的油井有油。伊深知，台灣人醫生衲袋錢多多，無地囥，逐家也想著錢滾錢，攏去投資伊的空頭油井，頭一年人人紅利分甲歡喜，紹介別人參加。地質學家錢收收咧，宣告破產。這是七十年代末年的故事，發生的地點油井是美國南部。

故事之三是有關天然氣開發公司，的參與者攏是高科技的台灣人菁英，這個故事投資的規模相當大，集資有數百萬美金，佫加上美國聯邦政府小型企業對等貸款金額。當初的投資者每人出十萬美金。經過六、七年的經營，公司破產，每十萬投資才分轉來三千美金。投資者有大企業家為著合法走稅的，有生理人辛苦錢想欲錢滾錢，有食頭路人儉落來的錢寄望退休時可以用。大企業家無真要緊十萬投資是唔是有回收，食頭路人只有參加的錢，無時間去監督，生理人有本身的事業，逐家委託其中一位投資者負責。當年拄好開始的時，這位工程教授參另外一位投資者來夠賓西，去天然氣井考察，投資者建議附近的一位台灣人工程師時時去監督氣井設備及工人的運作。

故事之三患著故事之一及之二的毛病：無簽契約，完全委託其中一人全權處理，佫無財務報告的制度。去互負責的工程教授歪了了，伊的手法比故事之一的「烏洞」天文學家佫卡厲害，烏洞天文學家才吞二、三萬美金，工程教授用六、七年吞美金五、六百萬，唔定騙台灣同鄉，連美國聯邦政府也騙。眾人合資的天然氣公司破產，伊在就近經營一間控油公司。

在太平洋的夏娃伊意群島遊覽，見識著：台灣人的大旅社、安娜房地產兼旅行社、朋友講起合資生理的故事，互咱感受著台灣人群体運作的文化猶有不足。當然成功的合資企業的例是有，親像島內的施振榮開發的宏_電腦公司，唔是家族企業，是共生共榮的企業。咱需要即款的共生共榮的企業經營文化，唯即款的共生共榮的企業運作出發，無定著咱台灣人有修改「商人無祖國」的文化觀。

2000-2-26記