夏娃伊意紀遊

茂宜島若以Kahului港口作中心，畫一條南北線，拄好畫過島上上窄的叫作「地峽」的所在。東爿島大，西爿島只有東爿的三分一。東及西爿本誠是分開的兩個島，西島年代卡長遠。咱講過，夏娃伊意群島攏是唯大島所出世的，然後向西方移徙。四重溪攏在西爿茂宜島，尖山古戰場屬於屠殺溪(Wailuku)的谷地，設作「尖山谷州立公園」。阮的旅行團只遊西爿島。

唯尖山古戰場落來，來夠平地，大巴士停在「茂宜熱帶農場」的參觀中心，這個農場是在聖溪(Waikapu)地區，有二十五甲之大。有電動拖車載旅客參觀農場，農作物主要是木瓜、芎蕉、旺萊及甘蔗，不而過，甘蔗消失中。中心有農產食品店及餐廳，阮停車買紀念產品爾爾。茂宜島有真濟薑，停車場就有薑的花園，其實所有夏娃伊意群島攏真濟薑。農場中心的停車場佫有大樹叫作Monkey Pod，樹尾開花那像蓮霧花。

甘蔗耕作的勞工歹找，主要靠外籍勞工，親像中國勞工抑是日本勞工。為著省工，時常是甘蔗採收了後，蔗頭留咧，互伊發新芛。按呢，有二款好處。第一是省去新插甘蔗栽，第二是縮短成長期。即款作法叫作二年生。在故鄉台灣，阮兜是作穡人，常常種甘蔗互會社磅去製糖，共款嘛有時採取二年生的好處。

半點鐘外，巴士繼續行程，沿著30號公路向南開，愈開愈離開四重溪谷及尖山古戰場。

路邊看過去，甘蔗遍地；煞落去是旺萊園；佫過去是山坪前的土地，生著矮矮的樹林，可能是用來製紙的樹木。但是，山坪本身土色黃黃、無樹木也無草，看是欠水雨的緣故；因為地形雨無法度在山坪形成。四重溪谷山勢高，有地形雨的致蔭，雨水澎湃。古早夏娃伊意人種芋仔的時代，雨水真夠用。西方人來夠夏娃伊意，開發經濟作物，需要大量的水；雨水煞無夠用，結局牛奶及牛攏送去美國大陸處理，然後牛肉及奶再運轉來夏娃伊意市場，當然另外一個原因是為著避免污染。

南北上窄的所在，分割茂宜島成東及西兩爿，分割線的北部是Kahului港，南部是Maalaea海灣。大巴士順著公路30繼續向南，來夠Maalaea海灣的海墘，車停在「茂宜海洋中心」，是一座夏娃伊意水族館，號稱是世界第六大。逐家參觀水族館，同時，在館裡的餐廳食中晝。

水族館面海風大，親像台灣_春的「落山風」，橫掃地面威力足雄。落車欲行入水族館，忽然，看著一頂草笠仔，貼地，高速飛向我來；緊彎腰，手猛掃，順勢拾起來。徛直時，看著一身花紅洋裝向我撞來，原來是阮的導遊呂瓊瑤，草笠仔是伊的。呂女士是阮第三台車的共同導遊，伊唯法國來，幫忙「安娜房地產公司」初次接旅行團。伊對掣團旅行真有一手，帶阮唱歌講笑話，足有親和力。不而過，伊無夏娃伊意的景觀導遊經驗。就我知的，伊做過法國同鄉會會長，嘛是一九九三年世界台灣同鄉會副會長，是會長林文德的好助手。我一九九三年去維也納參加全歐夏令會及台灣文學研究會年會時，在夏令會見過伊。即綴遊夏娃伊意，伊也講起張義雄的「色區事；sex」故事。孔子公仔講：「食色性也。」導遊的意思大概是：色=性(sex)。

張義雄是油畫家，日日用色(彩)、沐(bak)色；這個色唔是彼個色啦；抑是這個色通彼個色。當時無認真聽，事後記持退色，到底伊是啥款的色區事笑話，我也掠未準啦。不而過，張義雄我知伊的人，因為，第一次見著伊，是在我徛家厝茉里鄉厝內，伊參畫家張萬傳、洪瑞麟及柯文杞來阮兜過暝。一九八五年美術家洪根深教安排四人畫展，在美東夏令會展出，然後，各地巡迴演講，來夠匹茲堡，在阮厝內過暝。張義雄人恬恬仔，替囡仔畫人頭，一張十箍美金，捐互同鄉會，阮兩個查某囝攏互伊畫過。伊人真有情，彼年聖誕節伊特別唯巴黎寄禮物來互阮兩個囡仔。八年後，一九九三年在全歐夏令會佫參伊見面，看著伊天真那囡仔的一面，伊在晚會表演「飯匙槍」蛇的刺激節目，伊手在籠仔內佫摸佫掠，親像掠一尾蛇的姿勢，忽然間，伊正手舉飯匙，倒手舉一枝手槍，大家看著，哈哈大笑。會後，眾人參加我同窗邱上義策劃導遊的中歐旅行團，張義雄及夫人嘛是團員，伊一路有機會就是咧用色沐色，甚至在瑞士的雪峰Matterhorn頂抹色，畫瞬間千變萬化的玉峰雲彩。這就是張義雄的色故事。想未夠，張義雄的色故事唯法國傳夠茂宜島，真正是色流萬里。

印象上深的是海翁(Whale)資料展覽，在遮，了解海翁有千里傳音的本事，互相聯絡。台灣民間信仰有千里眼及順風耳，比起海翁的千里耳，我比較卡相信海翁的本事及順風耳。眼視靠光波，耳聽靠聲波，雖然光速比聲速佫卡神速，但是目珠無看千里的本事，耳聽千里可以相信，海翁就是證明。天頂遠遠的飛行機，可以聽著機聲，但是看未著機影，就是證明。

食過晝，參觀過水族館，四台台灣遊客大巴士佫起程，向海翁村出發。

在十九世紀中葉，茂宜島是世界掠海翁的大本營。當然，海翁即馬是受保護的動物，美國已經禁止掠海翁啦。現在，只留落來一座海翁資料館，設在西半島西爿的Kaanapali海墘海翁村。互人憑吊早年掠海翁的盛況，掠海翁人的海上裝備及生活。資料館起在購物中心，算是吸引遊客消費的好景點，幫贊夏娃伊意的觀光收入。

來去海翁村，前後大約一點鐘爾爾，大巴士那像著掠狂，趕人上車，緊佫上路，去夠一個海墘景點，時間才下午二點半爾爾。眾人喝：怎樣早早著收煞？無欲掣路佫去其他景點。來夠的所在是一個小鎮，專作觀光客生理的商業區。觀光事業界連手設計，將觀光客放牛食草，草埔是現代化的水泥購物中心。唯二點半夠六點食飯，放恁三點半鐘，反正恁無地走，只好踅購物中心，加減恁嘛會買一寡紀念品，飲寡飲料。

好好一個下午，去互觀光界放牛食草；犧牲參觀其他景點的機會；浪費來茂宜島；若是知影安呢，那有必要透早就出門趕飛機。Ana Realty and Travel Services無專業服務的導遊人才，煞連留學生也掠來準拄好；旅客付專業的費用，得著無專業的服務。在遮引發眾人的不滿，導遊夾在中央，受盡責罵，替旅行社受罪。旅行社及遊客是一款商業關係，一個付錢，一個提供服務。既然是帶團遊覽，導遊著愛有專業訓練及知識。以掠海翁博物館作例，六台巴士的導遊，只有一位是有專業知識，伊解說夏娃伊意掠海翁的歷史，其他五位只是便所的花瓶。

台灣人受國民黨的欺壓，反抗起來算是一級勇。對家己人欲抗爭的時，共款足極烈。即擺對安娜旅行社種種的不滿，有寡是劇烈進行：聲喉大，口氣硬；唔是心平氣和地爭取家己的權益。問題是一動氣，有時有理嘛煞互人感覺咱無理；唔知內情的外人一看，煞想講是惡聲的人傷歹！

食過暗頓，巴士載眾人去茂宜海濱旅社(Maui Coast Hotel)過暝，旅社在西島的北爿。今仔日，等於將西島由東、向南、夠西、往北，踅欲有一圈，離機場無外遠。隔早初六緊緊起床，旅社四周圍猶靜靜，椰子樹身腰軂軂，綠地一遍安祥，早早用過早點，趕去初五早時來的Kahului機場，結朿茂宜西島一日遊，飛回荷娜魯魯。

外島旅行結朿。

寫佇茉里鄉(2000-8-27)