伊帶領蕃薯仔行向天光 西方取經流浪二十外年 轉來夠母校的情人道 道上椰子樹尾依然透東風 樹腳杜鵑春花早道落土爛 道邊的水池仔荷花猶原盛開 唔知池畔猶會出現伊的形影無？ 時近黃昏八月天 情人道上水蛙仔蛤蛤叫 聲聲說說地傳話： 你若數念想卜見伊 愛徙過東爿去 佇椰子道盡磅的蕃薯園 伊會佮蟋蟀仔出來 行棋對談傳道 數理統計伊上內行 唔拘伊已經改行換頭路 即馬專門傳授民族解放社會學 因為伊發現數理世界傷過單純 佇社會學一加一常常是無限 那親像是王見王 對決生死是微妙歹料算 彼暝蕃薯壟隔開來的 唔是楚河漢界兩爿的人馬 也唔是銀河兩岸的牛郎織女 是分割陰陽的生及死 有的人煞白賊話加減講 伊是空腹無貨免白賊 夠時白賊七仔道愛過火去行奈河橋 伊是行過金橋銀橋變天星 帶領蕃薯仔行向天光 7-29-94定稿，收入胡民祥台語文學選。 12-3-95修改送互海外文藝發表。