了然的野蠻的台灣人 台灣人牛角印仔有夠濟 佫向犀牛借角 講是欲用來強心抗爭有本錢 其實啊 真殘忍嘛無彩工 台灣人佫按怎道是心內無角 聽著北京中南海的痟狗吠 怹道攏狉狉掣 台灣人衫有夠濟 佫向虎仔借皮衫 講是欲裝互飄翩人有體面 其實啊 真惡毒嘛無路用 台灣人佫按怎道是無穿衫 聽著北京中南海的痟狗叫春 怹道攏褪褪掉 台灣人鞭有夠濟 佫向鹿仔借鞭 講是欲用來強鞭走天下 其實啊 真絕種嘛加了鞭 台灣人佫按怎道是無鞭 聽著北京中南海的痟狗嚷一聲 怹道攏勼勼去 台灣人膽有夠濟 佫向熊借膽 講是欲膽疊膽人有勇氣 其實啊 真野蠻嘛加了膽 台灣人佫按怎道是無膽 聽著北京中南海的痟狗喝一聲 怹道攏驚驚死 寫佇茉里鄉家居 (94-7-29)