活佇台灣詩間 目珠展開 道想台語詩 坐上飯桌仔 道啖台灣米芳詩 開車上班的路中 道構造台灣牛車詩情 中晝歇睏的時 道鼻蕃薯詩味 暗頓食過 道吐蓬萊詩 神魂出遊的半暝 道夢台語詩 投入台灣詩間 摸詩綢 鼻詩味 聽詩聲 看詩景 詠詩情 浸佇台語詩間 透早精神 鼻著 醞釀二十年的詩酒 掠著一尾 < 因按呢講> 台獨 親像東洋電影 <羅生門> 一人講一款 秋天中晝時仔 行入山谷的一間餐廳 看著台灣湯匙 掠著一首 <台灣製> 台灣製行遍世界 半暝思念嘉南故鄉 腦海飛來一隻台灣烏秋 叫著 <你莫去> 北美洲留學 怎樣一去二十年 暝日掙 勣出一首 <世界傳奇> 中南海傳來 蟾蜍蛤蛤叫 驚醒 <東海天鵝> 一衝出頭天 潦落台灣詩海 掠台語詩 獻互台灣文學 作紅毛土 拍地基 11-18-93起稿 4-6-95定稿 北美賓西茉里鄉