蕃薯仔的心聲告白 詩人一流華語詩 無聽過南國哀歌 無吟過女工悲曲 無讀過亞細亞的孤兒 煞講蕃薯是無花果 掠準台灣無詩也無文學 等候流浪北美洲 佇革命的聖地 人人嘴講台灣話 學習台灣史地 看著賴和楊華吳濁流 捶心肝罵家己 早年目珠煞無金 台灣文學詩人 做陣渡帆回鄉 聽著蕃薯詩 煞講：有台語、無文學 有寡道理的款 那像：有老母、無夫人 半世紀前有亂都之戀的詩人 伊講台語是土話無文學價值 本土草地姑娘粗俗 那可比評唐山佳麗優雅 寫三十外冬少人看 唔是咱的詩無夠好 是蕃薯仔無愛芋仔文 鄉親煞唔知咱的詩 是圓抑是扁 也唔是鄉親唔捌詩 是咱的詩講外來語 失去母語蕃薯韻 鄉親聽著芋仔聲 耳孔未起共鳴 心肝頭未振動 斯文人寫華文詩 外來語隔一重紗 走路兄弟未曉欣賞 烏手的寫台語詩 吟詠母親的名叫台灣 連斯文人嘛喝讚 民主選舉靠一枝嘴 候選人開嘴講台語 聲聲母語拍夠心肝底 詩的語言藝術 無母語那有法度佮眾人交通 上電台唸詩用貴族華語 鄉親有聽沒有懂 1995年6月2日初稿， 1998年6月6日定稿。 寫佇北美賓西茉里鄉