鄉親免驚 鄉親 徛佇核羅里達的海墘 心內看著台灣的海岸溪邊 那會輸美洲的風光海景 親像故鄉的妹妹 當然卡水美國姑娘 萬里迢迢來相會 是咱珍惜鄉情 鄉親 踏佇日光炎炎的加州海岸 想著咱的根 台灣人民的祖國 故鄉美麗島嶼萬里外 佇西太平洋搖仔搖 蕃薯仔囝一代搖過一代 蕃薯仔孫一代湠過一代 鄉親 徛佇長長的橋頭 心頭有時有寡驚惶 親像祖先渡過烏水溝 有命運家貨仔無安全的款 我講：鄉親免著驚 咱的心那肉粽 一粒一粒燒燒 縛縛作一倌 合齊來做政治頭家 咱道財產生命有倚靠 免驚 鄉親 免驚 鄉親 盤山過海來相會 是父母疼囝長流水 是囝孝父母情難忘 親情厚厚深深長長 因為咱來夠 核羅里達的海墘含笑 海風微微 鄉親 自古咱道是貿易的民族 海洋陸地攏是咱的舞台 咱各行各業人材濟濟 烏手女工拍拼生產 一再創造經濟的奇蹟 中小企業誅風箭浪 台灣製行銷世界 咱是飄撇的海洋民族 鄉親啊 鄉親 驚伊甚麼飛彈 中南海的狗仔真愛吠 會吠的狗無半撇 舉頭挺胸拄咱衝 台灣是咱的天地 世界是咱的舞台 台灣共和國的公民 勇敢向前行 初稿寫佇核羅里達的清水鎮 七月廿一日中國飛彈射向台灣北方海面 八月十日定稿北美賓西茉里鄉厝內 茄苳，8期，1996-1，頁24-25。 笠詩刊，191期，1996-2，頁61-63。