行動家 行在眾人頭前做導師 伊是行動家 踏實的行動嬴過千言萬語 行在眾人頭前作燈火 伊是文化先知政治運動家 開拓濟濟壯美的典範事蹟 朋友叫伊菜頭 有蕃薯仔彼款的親切 疼痛伊的牽手千金 伊是心直嘴也直的男子漢 敢愛敢恨 愛某愛囡愛台灣人 恨外來政權的橫惡殘殺 即位敢愛敢恨的男子漢 1995年秋天轉去 在生短短五十一年 伊的告別 親人心碎腸割 朋友同學鄉親哀傷 做一個翁婿 伊是女權的行動家 尊重牽手的事業 分擔家事洗碗煮飯 做一個老父 伊是疼囡的行動家 教囡拍球、讀冊、遊山玩水 一家和樂有美滿的家庭 做一個朋友 伊是珍惜友情的行動家 食好鬥相報 會幫你埕裡種樹仔 會教你拍網球跳舞 車借你去旅遊 做一位工程師 伊是出色的行動家 善用熱流學 研究提升平板玻璃品質 善用流体力學的技術 探堪油井採油 研究成果發表作工程論文 做一個大學生 伊是熱愛鄉土的行動家 六十年代單車環島旅行 騎過蘇花公路東海岸 落南夠鵝鑾鼻 北上西海岸阿里山腳 直衝山城新竹、桃園大溪 沿路攬著台灣土地美麗島 看盡城市莊腳的父老蕃薯仔 在伊的頭殼底、心肝窟仔 留落來深刻的記憶： 鄉土台灣人民 做一個留學生 伊是愛鄉的行動家 以球會友辦活動 做同鄉會理事 開放家己的厝 作學生交流中心 烘肉招待學生 聚集開講 宣揚台灣獨立理念 對抗校園特務 做一個台灣人 伊是勇敢的行動家 兄弟互外來政權謀殺 棄屍台大校園 伊公開作證 唔是畏罪自殺 是政治謀殺 白色恐怖時 代戰勝驚惶 美國國會作證 石破天驚 做一個台獨運動者 伊是忠誠組織的行動家 1989年夏天，唯一的一位 接受招幕闖關回台灣 面對軍警宣揚台獨理念 拒收驅逐出境的公文 官方用催淚彈 掠著遣送北美洲 台獨聯盟猶是叛亂組織的時代 伊是拼生命 好膽壯美的行動家 做一個台灣民族的建國運動家 伊看清文化中國會毒死台獨 掠準台灣語文是台灣文化的根本 拼命推展「嘴講父母話，手寫台灣文」 唯「嘴講台灣話，手寫台語文」落手 面對質疑及挑戰，伊攏無失志放棄 照常油燃夠盡磅，燒甲腊燭變火灰 實在是淒涼壯美的行動家 1995-10-13