懷念菜頭 悼 蔡正隆同窗 胡敏雄 一. 唔是頻果 也唔是西瓜 伊是菜頭 有蕃薯仔彼款的親切 有伊菜頭的所在 笑聲滿四界 二. 佇賓州的西爿 有長溪也有大河 有山崙仔也有山谷 秋天的溪墘仔山坪 一片紅葩葩 親像伊菜頭的的心 一片熱火火 照出明霞 湠出伊蓮及嫘思莉兩千金 互菜頭疼惜惜 毛 因挽頻果 帶 因買西瓜 教 因拍球讀冊 三. 菜頭有幫忙分享的天性 生日送你保溫手套 提工具親身來 幫你裝車庫自動門 秋天種樹仔伊來鬥挖孔 車道積雪伊來佮你清 搬落南國休士頓 送你清雪的保溫衫仔褲 四. 菜頭疼痛某囡親成朋友 伊嘛愛蕃薯仔 走蹤寫批辦活動 招待留學生 推動蕃薯仔出頭天的運動 做同鄉會理事、會長、夏令會總幹事 痛恨國民黨謀殺伊的兄弟陳文成 衝破天羅地網回台灣 街頭演講台灣獨立建國 做蕃薯聯盟的頭 推動台灣語文運動 無管身体是上界暗淡的日子 照常燃夠盡磅 燒甲腊燭變火灰 五. 佇菜頭一家生湠的賓西綠堡 佫是秋葉明亮那霞的季節 二樓窗仔門外 青紅楓葉枝頭飄搖 那像有伊光彩的笑容 飛行機飛過賓西紅葩葩的山嶺 那像有伊身材修長的形影 蕃薯仔聚集的所在 那像有伊明朗的笑聲 明霞的肩胛頭 依蓮的身軀邊 嫘思莉的後面 那像有伊疼痛的眼神 六. 伊的疼痛伊的愛 有時聲大那雷公 佇室內街頭巷尾演講 伊的疼痛伊的愛 有時無聲無說 目珠投落某囡的身軀 伊的疼痛伊的愛 有時暝日相隨 有時異鄉相思 無論聲音大抑細 伊的疼痛無所不在 不管聚會時間長抑短 伊的疼痛無時無盡 七. 唔是頻果 也唔是西瓜 伊是菜頭 有蕃薯仔彼款的親切 伊是菜頭 人人懷念的菜頭 伊是菜頭 人人敬偑的菜頭 有伊的所在 笑聲滿四界後記：1995年10月18日拜作，寫佇北美賓西茉里鄉，21日，佇休士頓台灣人活動中心，在追悼會獻詩懷念。