傀儡及干轆 戲棚頂搬布袋戲 傀儡仔一身一身出場 戲棚腳釘干轆 干轆一粒一粒踅 農業時代冬尾時仔 大大細細釘干轆 干轆互人摔一下 緊踅出一場特技表演 頭大腳幼秀 激情過了 獨腳徛未栽 橫身胖肚死死去 來夠工業社會的島嶼 樹枝製的干轆失勢 退出冬尾時仔的街頭 民主政治候選人出場 大多數頭大腳細那干轆 有血有肉的傀儡 有情有氣的干轆 中著執政者的魔法 人山人海的傀儡 觀賞一場佫一場的干轆演說 激情合演卜執政的迷夢 選舉期間鬧熱滾滾 傀儡干轆做伙掠狂 選後四肢軟惜惜 干轆入去議會變官芋仔 傀儡臭香也死死去 干轆仔的蕃薯政客 隨在人摔 干轆敢知影怎樣突破? 會曉主導戲棚頂的政治 干轆才會出頭天 傀儡仔的蕃薯選民 隨在人搬 傀儡敢知影怎樣翻身？ 天天掌握戲棚腳的民主 傀儡仔才會翻身做主人 1994初稿 12-4-95稿成茉里鄉 文學台灣，18期，1996-4，春季號，頁110-112。