攬向夢中的恁爹地 我有一個同窗知己 恁爹地的同志 早你四個月轉去 揀著秋天麥仔金黃的時陣 恁爹地講伊魂魄歸鄉 半年來我不時想著伊 奈何夢中猶未見著伊 你選早春 佇恁爹地踅過半粒地球 來夠嘉南地的南鯤鯓廟 台語文學的聖地 我朋友的牽手來一通電話 佇恁爹地演講進前五分鐘 恁爹地條理分明 談伊台語文學的寫作 一場感動人的演講 講煞向我行來 講伊馬上愛倒轉去美國 恁爹地六神無主 唔知卜按怎辦 接著電話進前彼暝 恁爹地來五王廟的第二暗 眾文友夜談中 一向健談的恁爹地 真早恬恬仔轉去房間歇睏 敢是你卜來託夢？ 半年內恁爹地寫兩擺祭詩 一首互五十一歲的朋友 一首互二十五歲英年的你 佇孤單的暗暝 聲聲叫天公 句句問上帝 唔知恁佇西天有做伙無？ 我的朋友若來夠我夢中 我卜拜託伊 請你緊來託夢 攬向夢中的恁爹地 寫佇賓西茉里鄉，1996年4月21日稿成。 後記：看著忠松互怹後生的一篇祭文，最近佮木盛兄電話中，我問起忠松的現狀，知影伊猶原佇思念後生的悲傷中。無偌久，公論報登出伊一首祭詩：<哀慟--志榮>，聲聲句句問伊的後生，是按怎？是按怎？佇南鯤鯓轉來，我有拍一通電話去安慰伊。總是言語有時盡，想來想去，寫一首詩來回應伊。