湧 --互明霞 一. 舊年熱天離別南都 一路踅過墨西哥灣 來夠核羅里達的海邊 海沙白雪雪的Pensacola海墘 受著你的吩咐 一通電話互恁牽手 卜繼續運動落去 煞落一通互你的好厝邊 才知影 你已經是氣那遊絲 只是外口好看頭 徛佇白沙海墘 看著墨西哥灣的海湧 來自海天一色的藍鄉 波浪湧過來、湧過來、湧過來 湧夠腳頭前 一湧佫一湧佫一湧佫一湧 一湧是親情一湧是運動 親情、運動、親情、運動 唔知應該揀佗一湧？ 海湧依然一湧佫一湧 湧夠目珠裡 煞分未清運動抑是親情 二. 舊年秋天佫來南都 看無著在生的你 看著的是你安歇的面貌 迄日蕃薯仔那海湧 美洲台灣四面八方湧過來 有人悲傷有人割腸 有人目珠起海湧 阿伯的心肝仔囝 阿姆的目珠起風颱雨 三. 今年春天去 Pensacola 出差 海沙依然白雪雪 墨西哥灣照常起海湧 共款一湧佫一湧佫一湧 唔知影你即馬佇佗位 總是道愛講互你知 你潦過的推拺的語文運動那海湧 現在是一湧捲一湧佫捲一湧 湧夠濟濟的美洲的台鄉地區 四. 今年熱天來美西洛杉磯 沿路想著你 雖然活人一半的歲壽 郤是食人二倍的鹽 佫是作人三倍的代誌 真濟攏是驚天動地的事情 親像用生命感動同志 促成怹對民族母語文的覺醒 濟濟的人趕來洛杉磯 參加你開始的母語文夏令會 台灣民族母語文的將來 會親像墨西哥灣的海湧 一湧佫一湧佫一湧佫一湧 湧裡會看著你的形影 湧裡會顯示你的生命 後記：1996年8月3日作成，同日佇第二 屆北美洲台語文夏令會，台文之夜唸讀 互運動的朋友，洛杉磯，Hilton Hotel。