|
來去的時 1992 (d)
卜出來的時 是唔捌世事的年紀 阮老母心內講：你莫去？ 轉去的時 是有增加四分之一世紀的年紀 阮老母講：敢會調差倒轉來？ 拄出來的時 是唔捌芋仔抑是蕃薯的時代 阮聽人講起：蕃薯唔通飼豬？ 轉去的時 是有芋仔變蕃薯的年代 阮聽人講起：蕃薯卜出頭天？ 才出來的時 是唔捌鄉土史的少年家 阮聽人講起：南島語族的代誌？ 轉去的時 是有寡社會史地常識的中年人 阮聽人講起：南島語族嘛卜來翻身？ 初初出來的時 是唔捌女性也有主義 阮聽人講起：婦女愛運動？ 轉去的時 是有習慣為女性開門的沙豬 阮聽人講起：婦女有新知猶無運動？ 今仔出來的時 是唔捌有甚麼勞工階級 阮聽人講起：鋼鐵工人卜罷工？ 轉去的時 是有寡同情工人的命運 阮聽人講起：客運司機罷工真不應該？ 頭頭出來的時 是唔捌懷疑科技萬能 阮聽人講起：化工廠放毒氣？ 轉去的時 是有環保意識的工程專家 阮聽人講起：工廠廢水灌落地下水？ 來去北美洲啊，東海岸 出外人啊，二十外冬 轉去美麗島啊，探親 社會及人物啊，攏起變化 雖然啊，一時亂紛紛 總是啊，人人自力救濟，民族有向(ng3)望 天光美麗島啦，行落去 台灣時代！
1992年作 |