山珍及海味 聽著一聲 雞仔金光丸 辣媽怹後生 面色煞白死剎 卡慘金光丸 佇淡水街仔食拜拜 煞半途來停箸 坐桌枵腹肚 這敢是美國肚 食四方 美國國土大 東爿有大西洋 西爿有太平洋 南爿有墨西哥灣 攏是蚵仔豐盛腥臊 西北爿有辣基山脈 唔認輸 怹嘛出產有山頂蚵 山頂蚵仔美國大 超過淡水雞仔蚵 冬尾時仔的埕斗 阮阿公手裡 提一枝尖刀 伊一刀落去 雞角仔金光丸落碗底 佫一刀落去 豬仔囝金光丸嘛落碗公 雞角仔豬仔囝無金光丸 攏清心敖大 細漢食過足濟 雞仔蚵 豬仔蚵 這攏是阮阿公的山產 怹無輸海產蚵仔 怹小而美 嘛無輸辣基山的牛蚵 美國牛金光丸號稱辣基山蚵 名聲透美洲世界人人呵咾 佇法蘭西參義大利料理湖 牛羊雉雞金光丸公稱美食珍寶 台灣枸杞雞金光丸不止是足補 伊本身道是一味山珍蚵 食食文化各國本誠值得互相扶 台灣參世界逐家可以評褒 料理花樣百百款 台灣有蚵仔煎海味 亦有淡水金光丸山珍 美國有餐館生蚵 亦有辣基山牛公金光丸 隨人意愛 奈有甚麼心肝窄 奈有甚麼民族自卑 文化本底道無懸及低 奈道改裝 人講：牡丹配青葉 世界水 我講：海味配山珍 世界讚 2002/5/27