|
我敬畏秋天
北美賓州的西爿 若是好天氣 一定是秋天 早起時草仔頂 天懸懸 有時雲來 郼像是鴨母王 娶一陣白番鴨飛過天 我敬畏賓西山河的秋天 長溪大河沿著山谷 踅過來彎過去 山崙仔紅葩葩那火燒 親像當年的曾文溪 流過江定的焦吧年山區 衝落嘉南平原出海去 我愛嘉南平原的秋天 徛佇曾文溪岸看去 甘蔗花開滿溪墘 青青的海 白點白點的湧 正是故鄉秋天的景緻 那像賓西晚秋的早雪 落佇青松的枝葉 賓西春夏山河之地 樹林濟濟 樹葉仔青翠青翠 一旦秋天來夠 大家本色來相見 黃底的展黃 紅底的現紅 免佫假仙青一色 落葉歸根過冬天 爛去滋養本土 為著明年春天囝孫的出世 我愛美麗島嶼的政治氣候 春夏已經消失 來夠秋天 檳榔芋仔蕃薯破腹來相見 唔是統一色免著驚 三千四年來著是安呢行 大家盤山過海來做陣 代代拍拼代代湠 大家攏會落土爛 滋養本島趁冬天 為著獨立的春天 我敬畏秋天 佇賓西山河之地 滿山秋葉紅紅紅 佇故鄉嘉南平原 甘蔗花開白白白 攏是換天的前景 我敬畏秋天
11-1-92初稿 |