楓樹葉 有一遍楓樹林 佇山坪 怹定山坪的土 怹食山坪的水 阮是怹身軀千千萬萬的葉仔 怹是阮維生的岫 透過楓樹根路 山坪是阮生存的本土 楓樹送阮水 怹佫送阮土來的礦物質 阮家己吸收空氣中的二氧化碳 經過阮的葉綠素工廠 阮見光製造楓糖 阮製糖報答楓樹 互怹春夏定根添枝抽長 隔年春天佫分寡互印地安人食甜 佫是阮後代囝孫抽芽生葉的糖分 阮有濟濟的兄弟姊妹 生佇無共款的草木蔬菜 分佈世界五大洲 兄弟姊妹佮阮共款 吸收土水兼廢氣 阮會製糖佫會放氧氣 無污染環境佫未破壞生態 阮是高明的太陽能專家 人類聽講也是能源轉化的專家 可憐是低路的 唔是阮的對手 人造化工廠放毒氣 火力發電廠製造酸雨 高溫高壓效率真差 輸阮小小仔葉綠素化工廠 印地安人是阮知己 怹知影阮的本事 可憐其他的人 唔知阮是寶 剉阮倒阮的岫 樹林一大遍一大遍消失 無阮 人類敢會有將來 初稿 (92-11-22)，抄送互北美洲「關懷台灣基金會」，感謝怹支持環保團體的工作。 定稿 (93-9-6)，收入「關懷台灣基金會」的叢書。