世界傳奇 人講中國蟾蜍肉真甜 敢有影 著唔捌食過咧 粗皮粗皮是真正 五十年代以來佇北京 蟾蜍的頭人 真青哥 褪光光想欲騎東海天鵝 暝日蛤蛤叫 人講北極熊的膽真大粒 敢有影 著唔捌宰過咧 熊掌粗大是真正 六十年代佇紐約 北極熊的頭人 真好膽 褪鞋仔拍聯合國的桌頂 拍甲碰踫叫 人講東洋櫻花真溫馴 敢有影 著唔捌摸著咧 武土刀利利是真正 七十年代佇東京 櫻花的頭人 真痟貪 褪衫褪褲泅夠釣魚台 摸鳥屎探石油 人講美國水蛙真大毛 敢有影 著唔捌釣著咧 尻川大圓是真正 八十年代佇華盛頓 水蛙的頭人 真古錐 褪出尻川頭刺伊的經濟政策 記者掙來看 人講蕃薯仔讀冊天地大 敢有影 著唔捌看過天咧 胛脊骿大大是真正 九十年代佇台北 蕃薯的頭人 真可憐 褪腹裼冊讀佇胛脊骿 讀甲天鵝倥倥唔知死 初稿 (92-12-23)，定稿 (93-1-19)。