|
樹人四季
佇秋天的季節 恁一身一身火紅洋裝 才那像是昨昏爾爾 今仔日早起 發現恁赤身抹白粉 啊，冬天雪啦 想起 夏天的時 恁一叢一叢青青青 鳥仔來歇胖鼠來爬 人來納涼來話仙 恁是怹歇睏的岫 想著 春天的時 恁一身一身花彩清芳 蝴蝶來舞蜂來採 花精點花房怹牽成 恁是新生命的花叢 看恁 春夏秋每季換新衫 竟然選冬天赤身含芽 帶新蕾風雪中練工夫 聽講若是堪得凍 春天才會佫花彩清芳 春天男女那像恁春木春花 牽手行入夏天的壯麗 中秋收成人月共圓 冬天顧囝搖孫過晚年 為著囝孫 會有怹的春天
1992-12-5初稿 |