條件的世界無良心 -- 嘉隆女工抗爭有感之二 汽車會載人 汽車也會撞人 汽車無良心 載人抑是撞人 端看社會的條件 有軌道的社會車載人 混亂的社會車撞人 工程博士教授會教育學生 工程博士教授也會剝削工人 教授敢無良心 教育抑是剝削 端看教授的條件 全職的教授教育學生 開工廠的教授剝削工人 水會浮船 水也會沉船 水無良心 浮船抑是沉船 端看水的條件 水靜無湧水會浮船 湧大風險水沉船 國家會造福百姓 國家也會惡毒人民 國家無良心 造福抑是惡 端看人民的條件 無力的百姓國家放毒 有力的人民國家造福 槍會拍鳥 槍也會殺人 槍無良心 拍鳥抑是殺人 端看人的條件 閑人愛爽槍拍鳥 歹人搶劫槍殺人 工人互人欺侮 工人也會抗爭 工人敢無良心 受欺侮抑是抗爭 端看工人的條件 散散的工人奴隸命 覺醒偎作堆著會出頭天 初稿 (93-4-9)，定稿 (93-9-4) 佇北美賓西山河之鄉。