教授老板雙面人 -- 嘉隆女工抗爭有感之一 一 簡老板經營紡織廠 做董事長使女工 簡博士兼職國立大學 做教授教學生 教授老板一身雙面人 校園內伊是勞動者 工廠裡伊是支配者 教授老板共一個人 二款的階級角色伊扮演 二 老板工廠訂私法 請假扣年終獎金 工廠的廁所煞有哭聲 女工家己生囝 教授學校勤教冊 學生相掙選伊的課 義務兼課無佔教授缺 學生及同事攏感謝伊 教授老板雙面人 校園內人人呵咾名聲好 工廠裡人人怨恨名聲臭 煞有好及臭二款的名聲 三 老板久年積欠加班費 紡織廠出走印尼 資遺費無影無跡 宿舍停電斷水 欲迫女工走路 唔管怹死活 教授無領半仙薪水 年年按時來上課 伊敬業 伊愛學生 教授老皮雙面人 教授疼學生伊心肝好 老板惡女工伊心肝毒 教授老板共一個人 煞生著二款的心肝 四 教授老板雙面人 伊演著二款階級的角色 伊煞好及臭二款的名聲 伊煞生出疼及惡二款的心肝 五 教授老板雙面人 伊生活佇分裂的世界 伊是社會對立共生的縮影 初稿 (93-4-10)，定稿 (93-9-6)