|
妹妹的心事
我的查某囝十歲外 一位天真古錐的妹妹 有時伊真敖管東管西 講我未使撣掉舊電視 管我唔通撣拺破眠床 唔知是按怎 我的汽車雪霧犁 為我忠心走十年 後來毛病一大堆 登報紙欲賣伊 妹妹講：留咧啦 咱的埕有夠大遍 會使互伊養老 厝角的木造涼亭仔 為阮盡力服務十外年 日晒風雨淋舊去 煞爛去一大片 伊的爸也計劃拆掉重起 妹妹講：勿啦 留咧互我作伴 有一暝 我做暗公鳥 聽著妹妹陷眠 伊講：媽媽勿啦 留咧啦 留咧啦 隔一陣仔 伊佫講：爸也 恁敢會 老去 4-15-93初稿 9-6-93定稿 佇北美賓西山河之鄉 |