鄉親 ──獻互邱上義先生 記一九九三年中歐旅行團 鄉親 故鄉萬里遠 思慕家鄉的心 將咱送做堆 佇音樂之都 千里迢迢來相會 是咱有緣 鄉親 咱各行各業 有社會政治運動家 有美術家也有文學者 有教授工程師佫有企業家 有家庭主婦猶有職業婦女 有南國松仔樹的竹梅 有荷蘭的台灣囝婿 有留學生嘛有原住民 那像故鄉的燒肉粽 一粒一粒縛縛作一倌 出現佇近代文明的歐洲 鄉親 咱是一台文化的遊覽車 行過平原丘陵 故鄉不時佇咱的眼中 踅過斷巖溪流 家園不時佇咱的腦海 行一步歐洲的公路 想一步故鄉的前途 看一眼瑞士的湖光城堡 想一幕美麗島嶼彩虹的前景 鄉親 咱是一群文化的蜜蜂 飛過歐洲的文化花園 採集怹土地及人文的蜜汁 學習瑞士族群和諧相處的秘密 卜醞釀台灣新文化 鄉親 台灣民族雖然猶原風風雨雨 唔拘 若用咱的頭殼及雙手 做一個有志氣佫有文化的新台灣人 風雨會過 天也會出虹 後記 「台灣文學研究會」謝里法會長及郭淑惠秘書策劃一九九三年年會，佮全歐同鄉會做伙舉行，佇維也納召開，會後參加夏令會的中歐旅行團。七月二十六日起程，先去捷克的首都布拉格，然後去德國、瑞士。沿路逐家遊山爽水，同時關懷台灣的民主發展，熱烈討論台灣文化，美術及文學，互相勉勵做一個有志氣佫有文化的新台灣人。 七月三十日遊覽車行過瑞士Alps的山路，風雨拄過，兩道彩虹出現佇車前青翠的山崙，導引遊覽車向前行。彼當時，我起稿寫即首《鄉親》詩，紀念六十二位同鄉做伙旅遊的情意及心志。彼暝佇瑞士小城鎮的Hotel St. Georg，我將初稿抄在旅舍的批紙，隔早影印一份。 近代的歐洲是民族國家紛紛出現的世界，也是濟濟民族語言大開母語文學花蕊的聖地。三十一日車行向恩士堡，早起時十點外，我唸出即首《鄉親》台語詩，台灣民族母語的音聲飄向同鄉，也傳夠歐洲的青山綠水，怹見證一個新生的台灣民族文學來探訪近代民族文學的聖地。 詩唸過，我將原稿贈送邱上義先生，我畢業三十一年來，初次見面的台南一中高中同窗，感謝伊苦心勞力帶領台灣文化旅行團；同時向主辦單位奧地利台灣同鄉會說謝。 轉來北美洲，將初稿修定五、六字，送「蕃薯詩刊」發表，記念一段難忘的旅遊。 佇北美賓西山河之鄉一九九三、八、十九