東西方相會 -- 世界村 秋天的中晝 離開辨公室 結著公司的職員證 行入社區的一間五金行 頭家沈頭看我胸前 問許先生佗位來 道是本地茉里鄉 唔是啦 你的出生地啦 敢是日本 我是台灣來 敢是屏東 彼 台灣你足清楚 頭家看來五十外 禿頭佫有一乾肚 講伊去過台北 滯過屏東 這道真正仔趣味 一九五八年 東西方陣營冷戰的時代 伊是二十歲少年家 做海陸仔遊世界 配屬美軍第七艦隊 長期駐守日本佐世堡 來屏東駐營百外工 一九五八年 台灣海峽緊張的年代 我是十五歲囡仔兄 做童子軍遊台灣 露營楓港四重溪 厝徛枋寮稻仔鄉 西來的海陸仔退伍回鄉 童子軍向東去無回頭 攏踅過萬里的海陸空 三十五年後 北美的秋天 賓州西爿的茉里鄉 東西方有緣來相會 囡仔兄搬去海陸仔的故鄉 海陸仔思念囡仔兄的祖地 檳榔樹尾透風的東港 海陸仔的舊遊之地 黃昏彩霞滿天的枋寮 囡仔兄思念的故鄉 11-13-93起稿 05-15-94定稿 作佇茉里鄉