牽手傳奇 一 阮阿爸的牽手 愛阮牽手 阮牽手天天看 看阮阿爸及伊的牽手 唔捌看怹牽手 阮阿爸的牽手 牽阮細漢的手 岸過戶定 行過埕 上街路 阮數念阿爸的牽手 二 美國仔男女興牽手 行路牽手 坐車也牽手 無管是唔是牽手 我的蕃薯仔兄弟 食著美國仔嘴瀾 也愛牽伊的牽手 拄著蕃薯仔朋友 佫會歹勢 緊放手 三 美麗島嶼檳榔鄉 南島語族的姑娘獨家厝 多情少年家厝前獻唱 姑娘恰意來牽手 拜見父母入姑娘的家厝 少年家變作姑娘的牽手 四 唐山客羅漢腳仔 看著南島姑娘那仙女 也緊互伊牽手 唐山客猴齊天 唐山牽手變頭家 南島姑娘變牽手 牽手換手 奇奇奇！ 五 蕃薯仔事業興旺 有資金佫家厝 竟然無愛登記主權 也無想著家己做主人 倥倥倥 大門開開 佮唐山虎姑婆牽手 經營虎標征台丸 本錢連家厝總輸 囡仔變作血紅鳳爪 半暝互伊吞了了 六 牽手傳奇 奇奇奇！ 稿成茉里鄉 (94-1-11) 自立晚報本土副刊，1994-5-12。 自立周報濁水溪畔，1994-8-19。 台灣公論報，1994-11-16。