阿忠初戀 相拍阮上出名 模範生阮無額 早起升旗台前罰徛 食秘雕訓導的籐條 揮落腳尻跳 咻咻叫那風迎 阮道攏無惶 福利社後埕是阮示範場 我阿忠講道理教示人道著 定定收著模範生的眼神喲 小惠偷偷仔瞭 阮是國中放牛班 歸身軀力蠻 無佗位好消遣 暝時出遊捲陣 看人未爽道揮拳 國中畢業囉 阿惠照常去學校 複習課業準備聯考 阮放牛班兄弟閑閑街路掃 黃昏的路口 擋著小惠的車路 捧一朿黃花面前送夠 看伊若卜佫若惱 歹勢死紅面金目 車牽咧緊溜走 補一通電話去怹兜 講是愛聯考時間無夠 算好聯考過了三四工 電話約伊肉烘 卜去濁水溪大橋孔 伊雙手伸過來就攬 貼佇阮的胛脊枋 機車飛身也歪歪爽 西螺橋孔來去咱 聯考一放榜 阿惠考入北一女 阮原在是雲林故鄉蹉跎囝 朋友叫伊阿忠仔嫂 寒暑假伊轉來會找阮 也請阮去台北蹉跎 奈何一南一北 那像天及地 飛車閃入陰界 落花流水 阿惠哭甲目珠腫 心腸拍結 2002-9-29整理 1995年初稿