矛盾 / 胡民祥 一. 有矛無盾，矛煞死死無物仔通拄傷 無矛有盾，盾嘛死死無物仔好阻擋 矛來盾往，怹活跳運動 矛拄盾擋，怹相扣相生 哲學家煞按呢講 　　矛盾產生運動 　　運動才有命生 　　生命來自矛盾 二. 哲學家的矛盾定理 驗証人類族群的相殺相欺 夭壽仔準哩 想起！ 二千空一年九一一早起時 天藍藍的紐約市 先後飛入來兩隻烏烏的航天客機 那鐵矛迎著日光時速四百英里 瞬間射入兩座長條盾的摩天樓裡 噴射油發火鋼筋燒甲紅基基 千尺摩天樓兩座煞軟腳墜落地去 樓身粉碎連鞭濛霧衝天那火山吐汽 罩濛嘛落地街巷煞烏天暗地霧重滿滿是 這款激烈的矛盾對抗結局有夠悽慘哩 樓內數千條的生命攏總烏有去 三. 摩天樓變雲煙 美國總統一看掠狂 認定對敵是阿富汗神學士政權 掠講主謀是賓拉丁這個惡漢 卜掠伊 -- 死活免管 一時戰鼓喧天 一時鐵鳥仔飛滿天 吐出尖尖的鐵矛千千萬萬 那落雨落落落山嶺四界的阿富汗 山崩地裂火海滿天 離離落落神學士政權 無辜百姓死亡上百千足可憐 亦有婚禮喜事唱唱滾 尖尖鐵矛家己來無人請怹 主家參賓客的身軀攏變作肉片飛滿天 美國軍方記者會講是難免死傷 趕緊安排「佳哉Karzai將軍」做總統 成立取代神學士的新政權 卻是賓拉丁無影無痕 四. 神學士政權一倒擔 美國大眾人人喝讚 紐約死去數千人怹心疼 阿富汗有千外人死傷怹無關心 干單少數有良心 親像大學教授怹徛出來批評 佇MIT的語言學家杭士基教授講 　　美國政治矛、經濟矛、軍事矛高揚 　　佇世界各地，不時拄插、射宰、殺傷 長期受害的外國盾免不了起狂 拄好驗証哲學家的矛盾論 奈是甚麼回教文化邪惡滿腹怨恨 怹只是那像物理學的「作用反作用」共款 五. 九一一的矛盾來自中東 著是數十年來的以色列矛傷 著是數十年來的巴勒斯坦盾擋 美國大哥數十年來攏徛以色列這爿 年年軍援以色列數十億美金 以色列矛數十年來屠殺巴勒斯坦人 霸佔怹的田園 毀滅怹的厝宅仔埕巷 戰火亦燒夠美國大哥的埕斗前門 九一一以來大哥佫昂聲講 　　以色列火箭矛是正義之劍足正當 　　巴勒斯坦肉身盾是恐怖之子有夠殘 中東矛盾對立煞日日慘 亦有兩方的細囝變成矛盾的祭品 怹的血肉碎碎碎紅紅紅 六. 哲學家的矛盾論 夭壽仔準 只是怹 奈攏無看準 人類族群的矛盾運動 　　竟然是包括生命活吞 　　佫是惡性循環 　　一代過一代湠 　　一世紀過一世紀傳 這款人類矛盾何時了斷 佇茉里鄉起稿(2002-12-30)，2003-1-13定稿。