|
一半相思
/ 胡民祥
一.
眼前一粒溪石仔
是裂開來的一半粒
火灰色卵形的殼
烏渡青的半腹
殼裡有青苔的痕影
痕裡有茂林溪的流水聲
二.
舊年秋天
佇南台灣耍水觀山景
潦落去茂林仔溪床
參大肚魚仔走相蹤
半粒的石頭鋪滿溪園
我揀著這半粒石鵝卵
十月尾參我飛過雲天
降落北美洲的茉里鄉家園
路尾參我坐車來上班
天天佮我坐桌兼辦公
三.
鵝卵石一直無言無語
唔拘鵝卵定著會思想起
思想起萬里外另外一半的伊
那像左營半屏山會想起
想起失去萬萬年彼一半的伊
親像有老翁一半咧想思
想思已經往生久長至好一半的伊
寫佇茉里鄉 (2003-1-15)
| 