阮植物無恬恬 / 胡民祥 阮植物栽落土定根未徙位 無像恁人一日夠暗跑跑走 恁人拄著話厚聲昂 阮植物互恁看作是恬恬 那像柴頭仔未曉溝通的款 啊這是天大的誤會 阮隨時卜參恁用「形象」溝通啊 恁互阮植物一大堆的名 想卜參阮交陪作朋友 一直想卜參阮開講話仙 尾後恁攏吐大氣講是對牛談琴 啊這是天大的誤會 阮不時卜參恁用「符號」溝通啊 恁會徙動阮是堅持定居 除去恁及阮這款的精差 咱攏照物理定理行事啊！ 靠著聲波定理講話用耳溝通 靠著光波定理用符號參目珠溝通 恁的物理學家研究甲足徹底啊！ 恁奈煞未曉活用呢？ 抱定只有聲波才會使用來溝通 將用光波的形象語言撣去拺 實在恁是有眼無珠啊 恁有影介成是柴頭人 或者是恁對阮特別有卡刻薄 啊無，看恁參啞口兄姊比手勢 恁是真敖用符號語言溝通啊 其實恁的文字嘛是符號啊 符號語言定著愛靠目珠咯 請恁共款用目珠來解讀 阮豐富的符號及形象語言 當然有時阮嘛會出聲啦 恁看咧 天拄光日頭金光萬道 將阮植物一時鍍黃金彩 一點鐘後金彩褪去變綠色 詩人觀察阮一日的形象語言 掠著自然的真言：金色無久長 親像恁的水姑娘目珠會講話 阮秋天的蘋果樹掛滿 一粒一粒的嬌艷的水姑娘 怹目珠講話的媚力十足 參恁大人及囡仔形象溝通 怹攏偎過來參蘋果姑娘談情說愛 阮的桃花參恁詩人精彩對話 詩人吟詠出千古名句 -- 人面桃花相映紅 恁的印象派祖師莫內 參阮蓮花嘛有精彩的形象對話 互伊未食未睏繪上百幅的蓮花油畫 這款形象語言每幅攏迷盡世間人 恁講朋友相會攏會朴逗天氣 阮嘛是不時地參恁發聲講天氣啊 日炎熱氣逼人樹葉發出微微風聲 請恁來樹蔭腳納涼啊 風雨卜來阮嘛搖身軀兼發聲 來通知恁緊宓入恁厝內啊 阮足想卜參恁溝通啊 在恁無閒跑跑走的日子裡 請停落來參阮溝通 學恁藝術家彼款形象思維 來參阮交陪 咱就可以作夠人物兩相忘 盡在不言中 初稿，寫佇茉里鄉 (2003-1-22)，修改 (2003-1-23)