電 / 胡民祥 一. 愛迪生發明電火 可比人類祖先揣著火 有夠了不起 起電廠栽電柱牽電線 家家戶戶夜夜電火通明 一百年後外太空看落來 地球天天二九暝 那像約紐市時代廣場 頂頭吊一粒光迸迸的電火球 電互地球變作不夜球 二. 上班族起床無電暗迷濛 代先著是開電火 洗面嗽口有電動燒水隨來 清嘴齒有電齒抿 烘土司有電動烤箱 伸手電冰箱有牛奶 三. 出門上班坐電車 若是家己開車嘛愛電池啟動 來夠公司坐落卜辦公先開電腦 代先讀的是電子批 下班若慢轉來先拍電話向太太報備 四. 踏入家門電鍋傳來白米飯芳味 食過暗頓拍開電視 佫佇電火邊一面看晚報 客廳傳來查某囝的電子琴聲 愛睏上床嘛著用電 先是設電動亂鐘仔 倒落來一領電毯被 五. 婦人人愛水互人電頭毛 轉來煮菜用電爐 囡仔爽的嘛是電動玩具 警察用電棍仔修理人 天氣熱佇厝內吹電風 嘛可以去電影院吹冷氣 六. 人若不幸入病院嘛是電電叫 入去行電動門 上樓坐電梯 檢查五腑六臟有電光線 佫有心電圖 嘛有核子電磁波掃描 開刀用食電的雷射 佫有電療治神經的 七. 若不來電 那像電腦無電 那像電視無電 那像電車無電 那像電梯無電 無電的人類 宛然那中著“電身法” 煞未振未動 寫佇茉里鄉 (2003-1-26)