/ 胡民祥
入冬來天寒咻咻 行路人會頭勼手勼 鳥仔怹勼甲哮救救 土鼠往地下洞勼 熊乾脆勼佇山洞冬季退休 天寒怹逐家攏勼勼勼
樹木未曉徙位移動 怹選用一步褪 褪葉換穿細細勼勼的芽 樹木亦有無愛脫葉的 親像美洲杜鵑葉勼作水筆仔款 翠竹葉相共勼甲那細條春捲 自古松樹受過冰河的苦煉 一年透冬松葉勼成針形
埕尾的落葉堆裡 鹿仔來過暝一身勼作一丸 流浪狗偎壁角嘛勼身 散赤人亦是一家勼咧睏
就防止散熱抗寒來講 宇宙的智慧真相共 秘訣是一字勼爾爾
寫作茉里鄉 (2003-1-26)
