/ 胡民祥
雪花雪花咱佗位？ 阮是天頂落來飛； 雪花雪花恁奈一身白白？ 阮是天使穿白紗； 雪花天使恁敢會佫飛？ 日出來阮化身就來飛； 雪花天使恁會偌高飛？ 高夠天堂一路飛。
啊，天路一去白茫茫喂， 白茫茫喂； 奈會一去音訊攏無呢？ 阮多桑伊唔知夠位未？
啊，雪花天使好心的， 請恁一路著鬥揣， 掣伊往天堂互夠位； 拜託恁嘛轉達阮的話， 阮思念伊的話， 思念、思念伊的話。
佇上班的烏厝坊中晝踏雪散步時起稿， 暗時佇茉里鄉定稿(2003-1-24)
