台灣味青草茶 / 胡民祥 歹勢啦！阮 一本台灣文學入門文選 煞互恁看甲頭脹失眠 佫是歸身軀熱燙燙 朋友啊！恁 台灣味青草茶請 飲落去，退火清腸 恁講恁愛 裝活跳跳的磅浮一台 好來帶走滿腹熾燙的火海 朋友啊！來 台灣味青草茶佫飲一擺 紲落去請恁胸坎摸看覓 台灣阿母早道搭好一台 活跳跳的磅浮佇咱心內 學咱台灣阿母 我興做心靈的工程師 煞倒手編一本台灣文學入門書 其實我流体熱力學嘛足本事 我用正手寫這款診斷書： 咱的唐山膽固醇傷過高 咱的血煞傷過濁 血管早道塞甲強卜未通 有時食著好料理 煞是頭殼強卜斷腦筋 朋友啊！ 烏水溝彼爿的偏方緊撣掉 台灣味青草茶好葯方 佫配一寡台灣藝術、台灣文學入門 台灣歷史、台灣哲學、台灣碗糕趖 保證恁身爽血路通 倒落眠床絕對嘛是好眠夢 初稿寫佇茉里鄉 2003-2-7透早上班前