|
水蛙夢
/ 胡民祥
新正的茉里鄉冰雪封天寒，
一位朋友帶來加州的燒落熱；
送阮一隻四腳現現的水蛙，
互我想起做囡仔的台灣草地。
想著手舉釣竿的日子，
草蓊蓊的水溝邊趖來趖去，
釣竿線尾一球肚蚓仔；
草縫裡肚蚓球跳起又跳落，
四腳仔一吞一時唔甘放，
等候知死已經落落網。
這隻加州水蛙是足聰明的，
伊唔是彼款愛食肚蚓的；
伊嘛唔是彼款愛宓水池的，
親像日本詩人芭蕉的；
專門跳古池的，
浮通一聲的；
這隻水蛙坐咧，
宛然天竺菩薩的姿勢。
這隻水蛙坐佇蓮花葉仔，
一枝嘴笑哈哈，
舌頭一塊紅紅甜甜，
有一款晟人來斟伊的意味。
伊兩蕊目珠仁烏金烏金，
那磁石浮佇白奶水裡。
伊一身青檸檸，
揹一腳書包，
胸前當一模UCLA加州大學的印記。
這隻美國加州大學水蛙，
出現佇東方西方相會的洛杉磯。
這隻水蛙敢有本事再演一齣：
東方讀冊人的夢想
(敢會拄著西方姑娘顏如玉？)
西方囡仔人的童話
(姑娘敢會來斟東方水蛙王子？)
正月三十起稿，二月十八定稿。
茉里鄉(2003-2-18)
| 