地圖 / 劉大元 暗夜 伸手 躊躇 唔敢摸妳的面 烏暗中 千山障礙 烏暗中 海墘茫渺 聽人講 妳是美麗存在在過去 聽人講 妳是悲情雨落落未離 這括流傳的言語 攏是聽人講的話 或者虛迷的愛情 嘛是淡薄仔諷刺 暗夜 伸手 躊躇 唔敢摸妳的面 只好將妳繪一幅(pak)圖 隱藏心內 隱藏在 這幅地圖 千路千山千思千念 無路用是浪子途窮 這幅地圖 是妳溫存面容 是我鄉關他去 戀愛中 躊躇少年時 戀愛中 盤挪(poaN-noa)到老 煞 也是 無法度出發 煞也是… 暗夜 伸手 躊躇 唔敢摸妳的面 唔敢出發的 地圖 1999年六月 耶卡吽市
|
.
|
Te To / Lau Taigoan am ia chhun chhiu tiuN-ti m kaN mong li e min o am tiong chhian soaN chong-gai o am tiong hai kiN bong biau thiaN lang kong li si bi le chhun chai ti koe-khi thiaN lang kong li si pi-cheng ho lo lo boe li chit-koa liu-thoan e gian-gi long si thiaN lang kong e oe hek-chia hi-bi e ai-cheng mah si tam-po-ah hong-chhi am ia chhun chhiu tiuN-ti m kaN mong li e min chi ho chiong li oe chit pak to un-chong sim lai un-chong chai chit pak te-to chhian lo chian soaN chhian su chhian liam bo lo iong si long-chu to keng chit pak te-to si li un-chun bin-iong si goa hiong koan tha khi loan ai tiong tiuN-ti siau-lian si loan ai tiong poaN-noa kau lau soah iah si bo hoat to chhut-hoat soah iah si ... am ia chhun chhiu tiuN-ti m kaN mong li e min m kaN chhut-hoat e te-to June 1999, El Cajon
|